Èsi pussaivel da cumular?
Gea. Cumular è pussaivel, sche dapli ch'in sez è d'occupar en il circul electoral. L'electura u l'electur po dentant scriver maximalmain duas giadas il num d'ina candidata u d'in candidat sin il cedel electoral (art. 20 al. 3 LECG).
Èsi pussaivel da panaschar?
Gea. L'electura u l'electur po stritgar nums da candidatas e candidats sin in cedel electoral prestampà e remplazzar quels tras nums da candidatas e candidats d'autras glistas dal circul electoral (art. 20 al. 2 LECG). Er sin il cedel electoral vid èsi pussaivel da scriver nums da candidatas e candidats da differentas glistas.
Dastgan ins inditgar mo il numer da la candidata u dal candidat, sch'ins cumulescha u panaschescha?
Na. I n'è betg admess d'inditgar mo il numer da la candidata u dal candidat. I sto adina vegnir inditgà il num cumplet. Questas reglas valan tant per cedels electorals prestampads sco er per cedels electorals vids. Ils numers èn mo agids administrativs che servan a distinguer pli facilmain nums identics u sumegliants.
Tge capita, sche jau elegel damain persunas che quai che jau pudess en sasez eleger en mes circul electoral?
Sche l'electura u l'electur prenda ina glista prestampada e stritga sin quella tschertas candidatas e candidats, senza als remplazzar cun autras candidatas e candidats, resultan lingias vidas. Il medem capita, sche l'electura u l'electur prenda in cedel electoral vid e na scriva betg en tut las lingias nums da candidatas e candidats. Sch'il cedel electoral – ch'i saja in cedel prestampà u in cedel vid – cuntegna la designaziun d'ina glista u il numer d'ordinaziun, valan las lingias vidas sco vuschs supplementaras per questa glista. Sch'il cedel electoral na cuntegna nagina designaziun d'ina glista u nagin numer d'ordinaziun, na quintan las lingias vidas per naginas glistas (art. 23 al. 1 LECG).
Èsi er pussaivel d'eleger persunas che na figureschan betg sin ina glista dal circul electoral?
Na, quests nums vegnan stritgads. Els vegnan dentant quintads sco vuschs supplementaras, sch'il cedel electoral cuntegna ina designaziun d'ina glista u in numer d'ordinaziun. Sch'ina designaziun d'ina glista ed in numer d'ordinaziun mancan, na quintan questas vuschs betg (art. 23 al. 2 LECG).