Candidaturas individualas
Po ina persuna senza partida vegnir elegida en il Cussegl grond?
Da princip è quai pussaivel. Ina premissa d'elegibladad è dentant tranter auter che la persuna vegnia inditgada sin ina proposta electorala sco candidata u candidat. Sin la proposta electorala ston vegnir fatgas las indicaziuns davart la persuna che vegnan pretendidas da la lescha (art. 8 LECG). La proposta electorala sto avair ina designaziun ed esser suttascritta da tschintg persunas cun dretg da votar ch'abitan en il circul electoral. La finala sto la proposta electorala arrivar ad uras, pia fin il pli tard ils 21 da favrer 2022, a las 12.00, tar la regiun cumpetenta per il circul electoral. Er ina persuna singula senza partida po ademplir questas premissas. Las schanzas ch'ella vegnia elegida èn dentant pitschnas (cf. dumonda «Quant grondas èn las schanzas da vegnir elegì?»).
Quant grondas èn las schanzas da vegnir elegì en cas d'ina candidatura individuala (p.ex. d'ina persuna senza partida)?
A l'attribuziun (superiura) dals 120 sezs dal Cussegl grond dastgan sa participar mo glistas resp. gruppas da glistas che cuntanschan en l'entir chantun ina quota d'electuras ed electurs d'almain 3 pertschient (quorum; art. 26 LECG). Quai vul dir che mo persunas da las glistas che cuntanschan quest quorum survegnan in sez en il Cussegl grond. Ina persuna singula po dentant candidar mo en in circul electoral e stuess pia survegnir en in sulet circul electoral 3 pertschient da tut las vuschs da tut il chantun. Schizunt en circuls electorals cun in grond dumber d'abitantas ed abitants èn las schanzas da vegnir elegì pia pitschnas en cas d'ina candidatura individuala.
Co pon persunas senza partida meglierar lur schanzas da vegnir elegidas?
Persunas senza partida da tut il chantun pudessan p.ex. furmar ina gruppa da glistas cuminaivla che cumpiglia plirs circuls electorals. Per quest intent stuessan ellas prevair ina designaziun identica per lur propostas electoralas che vegnissan inoltradas en differents circuls electorals – e far ina decleraziun correspundenta. Quai avess per consequenza che las vuschs obtegnidas (resp. las quotas d'electuras ed electurs) per questa gruppa da glistas vegnissan quintadas ensemen, uschia ch'il quorum da 3 pertschient pudess vegnir cuntanschì per l'attribuziun superiura e ch'i resultass pia la schanza da gudagnar in sez. Tgeninas da las candidatas e tgenins dals candidats senza partida che survegnissan lura in sez, vegniss decidì en la sutattribuziun.