L'onn 2010 èn la confederaziun ed ils chantuns sa cunvegnids da sviluppar vinavant la promoziun specifica da l'integraziun da persuns estras en Svizra e da fixar ina strategia cuminaivla. Sin basa da quai finanziescha la confederaziun en il rom da programs chantunals d'integraziun decisivamain la promoziun da l'integraziun en ils chantuns.
La fasa da l'emprim program chantunal d'integraziun (PCI 1) ha durà ils onns 2014 fin 2017. Directamain suenter è suandà in segund program chantunal d'integraziun (PCI 2) che ha durà ils onns 2018 fin 2021. Per transferir l'Agenda d'integraziun (AIS) e divers programs da pilot specifics en ils programs chantunals d'integraziun, han la Confederaziun ed ils chantuns concludì excepziunalmain ina perioda da 2 onns per ils onns 2022 e 2023. A partir da l'onn 2024 è puspè planisada ina fasa regulara da 4 onns per il PCI.
Documents
Kantonales Integrationsprogramm Graubünden KIP 3 (2024-2027)
Kantonales Integrationsprogramm Graubünden KIP 2bis
(2022-2023)
Kantonales Integrationsprogramm Graubünden KIP 2 (2018-2021)
Kantonales Integrationsprogramm Graubünden KIP 1 (2014-2017)
Resumaziun PCI 1 (2014-2017)
Ulteriur svilup persistent da la promoziun da l'integraziun
Ils programs chantunals d'integraziun duai promover ed implementar persistentamain – tras in process cun ina vasta basa – l'ulteriur svilup da la promoziun da l'integraziun da persunas estras en il chantun. Uschia vegnan amplifitgadas cun cleras finamiras las purschidas existentas gia oz per la promoziun da l'integraziun cun mesiras orientadas al basegn, sco ch'i mussan ils exempels qua sutvart: Metter a disposiziun material d'infurmaziun en las linguas discurridas il pli savens en il chantun davart dumondas dal dumagnar il mintgadi, sustegnair las vischnancas ad intermediar emprimas infurmaziuns a persunas ch'èn gist arrivadas, cussegliar persunas cun in basegn d'integraziun particular, amplifitgar regiunalmain e tenor basegn curs da lingua en collavuraziun cun vischnancas e cun uffizis socials, crear la basa per la promoziun tempriva d'uffants dischavantagiads socialmain gia en la vegliadetgna prescolara e sustegnair projects da pilot, promover la collavuraziun cun geniturs da lingua estra en scola, meglierar l'access a la scolaziun ed a la furmaziun per persunas ch'èn arrivadas tard e per giuvenils da lingua estra, rinforzar l'integraziun da patrunas e da patruns en la promoziun da l'integraziun sco er promover projects communals per integrar la populaziun estra.
La finamira dals programs chantunals d'integraziun è quella da crear – cun soluziuns pragmaticas ed observond la vicendaivladad dals dretgs e dals duairs – perspectivas da svilup per tut las gruppas da la populaziun en il chantun.