Promoziun da projects d'integraziun
La Confederaziun, ils chantuns e las vischnancas promovan l'integraziun da persunas estras en emprima lingia sur las structuras regularas, particularmain en ils secturs da la furmaziun, da la lavur, dals fatgs da sanadad e da la segirezza sociala. Els mettan a disposiziun purschidas per dar a tut las persunas che han il dretg da survegnir prestaziuns – independentamain da lur derivanza – las medemas schanzas d'access a la vita sociala, economica e culturala.
En il sistem datti dentant adina largias – persunas che n'han nagin access u structuras che dovran sustegn. Qua vegn la promoziun specifica da l'integraziun en acziun. Sin basa dal Program chantunal d'integraziun (PCI) paja il Post spezialisà per l'integraziun contribuziuns finanzialas per sustegnair projects che na cumpletteschan betg mo la promoziun da l'integraziun en las structuras regularas, mabain che porschan anc dapli. Quai èn projects en ils secturs da l'infurmaziun, da la furmaziun facila, da l'integraziun sociala, da la promoziun tempriva e da la furmaziun da geniturs.
Vus pudais inoltrar Vossa dumonda da project sur nossa plattafurma online. Sche Vus duvrais agid, purschain nus gugent sustegn.
En ils suandants documents chattais Vus las directivas davart la promoziun da projects ed ils criteris che las dumondas da project ston ademplir. Il dretg da survegnir ina contribuziun finanziala n'è betg garantì.
Directivas
Directivas per projects per promover l'infurmaziun, la furmaziun facila e l'integraziun sociala
Directivas da promoziun tempriva e da furmaziun da geniturs