La Regenza garantescha a la vischnanca da Flem ina contribuziun chantunala per construir ina nova pendiculara che remplazza la pendiculara da latg sin l'Alp Crap da Flem.
Contribuziun chantunala per remplazzar la pendiculara da latg Fidaz–Alp Crap da Flem
La Regenza garantescha a la vischnanca da Flem
ina contribuziun chantunala da maximalmain 569 600 francs per construir
ina nova pendiculara che remplazza la pendiculara da latg Fidaz–Alp Crap da Flem. Questa contribuziun premetta ina contribuziun federala da maximalmain
587400 francs. Ils custs imputabels per la calculaziun da la contribuziun
importan 1,78 milliuns francs.
La pendiculara da transport existenta d'in
vial da Fidaz sin il Crap da Flem fin a la staziun da muntogna sper l'Alp Sura
renda accessibla l'Alp Crap da Flem (2054 m s.m.). Ella è pli
che 50 onns veglia ed ha cuntanschì la fin da sia durada da vita. La
pendiculara na correspunda betg pli a las pretensiuns dad ozendi per cuntinuar
cun il manaschi d'alp agricul. Tocs da reserva per reparaturas na datti betg
pli. Plinavant na correspunda l'indriz da cumond da l'implant betg pli a las
pretensiuns da la segirezza tecnica actuala. Per quests motivs sto la
pendiculara da transport existenta vegnir remplazzada, per ch'il manaschi da
l'Alp Crap da Flem saja garantì per ils proxims decennis.
En il rom dal project vegn remplazzada la
pendiculara da transport. Durant il temp da manaschi che la pendiculara na vegn
betg duvrada per l'alp, vegn ella duvrada per intents turistics per il
transport da persunas. Il temp da manaschi sa limitescha a la perioda da mez
matg fin la fin d'october.
© Reto Durisch, Dipl. Architekt FH
La Regenza garantescha a la vischnanca da Flem ina contribuziun chantunala da maximalmain 569 600 francs per construir ina nova pendiculara che remplazza la pendiculara da latg Fidaz–Alp Crap da Flem.
