Il plan directiv Energia (PDChant-E) realisescha localmain las strategias d'energia e da la protecziun dal clima da la Confederaziun e dal chantun. Cun la «Strategia d'energia 2050» han las votantas svizras ed ils votants svizzers stgaffì la basa per reducir il consum d'energia, per midar da l'energia fossila a l'energia regenerabla, per reducir il consum d'energia e per sortir da l'energia nucleara. Er il Grischun ha elavurà basas giuridicas e strategicas cun la Lescha d'energia e cun il «Green Deal».
Tge effects han però questas strategias sin il svilup dal territori? Tge territoris èn adattads per la producziun d'energia regenerabla, per exempel per extender la forza idraulica u per considerar novs parcs da vent? Il chapitel «energia» dal Plan directiv chantunal dat ina survista actuala e mussa potenzials d'utilisaziun per il futur. Ina tala vista globala incl. consideraziun dals interess è indispensabla, particularmain per gronds projects d'energia d'aua, da vent u solara.
La forza idraulica è e resta la pli impurtanta producziun d'energia dal chantun ed ina pitga da l'economia grischuna.
- In'amplificaziun è pussaivla, sch'ins resguarda ils interess chantunals u naziunals en connex cun la protecziun da la natira, da la cuntrada, da las auas e da l'ambient. En quest connex ha l'amplificaziun da l'infrastructura existenta prioritad.
- En il senn d'ina vista globala chantunala numna il plan directiv tant ils projects da forza idraulica en vigur sco er novas ideas da project.
- Il potenzial d'amplifitgar sin trajects d'aua (flums) è limità en il Grischun. D'ina vart, perquai ch'in terz vegn gia utilisà. Quest terz correspunda però a dus terzs dal potenzial d'energia.
Per l'energia da vent mussa il plan directiv ina priorisaziun da lieus da staziunament pussaivels en il chantun.
- Resguardond ils criteris da la protecziun da l'ambient ed il potenzial dal vent resultan 25 territoris adattads per l'utilisaziun da l'energia da vent (priorisads en duas categorias).
L'energia solara vegn promovida vinavant.
- Il plan directiv na porscha actualmain nagina survista sco tar il vent. Il motiv è ch'il parlament federal ha concludì l'uschenumnà «Solarexpress». Perquai valan proceduras simplifitgadas e premissas per la permissiun pli simplas per implants fotovoltaics gronds, quai vul per exempel dir, che la planisaziun directiva e d'utilisaziun po vegnir sursiglida e ch'i èn pussaivlas permissiuns sur las proceduras EOZ. Sa basond sin las disposiziuns en il decret general (votaziun da referendum anc pendenta) vegnan fatgas determinaziuns per implants fotovoltaics gronds cumparegliablas a quellas dal vent.