Stabiliments d'accumulaziun e lur construcziuns da fermada servan a stagnar u ad accumular aua e glitta sco er a retegnair glera, glatsch e naiv. Ils intents d'utilisaziun principals d'accumular aua èn: producziun d'energia, provediment d'aua, sauaziun, ennavada artifiziala, allevament da peschs, reserva da stizzar e regulaziun da lais. Ca. 90 % da tut ils implants d'accumulaziun servan a l'idroelectricitad. Perquai ch'els retegnan l'aua, surpiglian ils batschigls da fermada plinavant ina rolla pli e pli impurtanta en cas d'aua gronda, quai cun limitar inundaziuns ed ils donns consecutivs dal flum giu.

La surveglianza dals stabiliments d'accumulaziun ha la finamira da garantir la segirezza dal stabiliment d'accumulaziun. La segirezza dals stabiliments d'accumulaziun sa basa sin trais elements:

• Segirezza constructiva
• Surveglianza e mantegniment
• Concept per cas d'urgenza