En il rom da la procedura chantunala d'urari elavura il chantun en collavuraziun cun las interpresas da transport l'urari per ils onns vegnints. L'Uffizi federal da traffic (UFT) fixescha ils princips per la procedura d'urari. Previsas èn periodas d'urari da dus onns che cumenzan mintgamai ils onns spèrs. Ils onns pèrs tranteren èn previsas mo pitschnas adattaziuns da la purschida.

Il chantun Grischun sa stenta adina da meglierar la purschida dal traffic public, quai cun resguardar las pussaivladads finanzialas. En la procedura d'urari han las regiuns, las vischnancas, interpresas e persunas privatas la pussaivladad da far valair propostas en connex cun la purschida dal traffic public.

Las presidentas ed ils presidents d'urari elegids da la Regenza èn responsabels per la concepziun detagliada da la procedura d'urari uffiziala en lur regiuns, sco per exempel per la publicaziun cumplementara en las medias regiunalas, per infurmar directamain las vischnancas e las gruppas d'interess, per convocar ina conferenza d'urari regiunala e.u.v. L'Uffizi d'energia e da traffic furnescha ad els las propostas per l'urari.

Suenter in'emprima valitaziun tras las presidentas ed ils presidents d'urari vegnan las propostas discutadas cun l'Uffizi d'energia e da traffic, partiziun Traffic public, sco er cun las interpresas da transport. Las propostas vegnan accordadas cun las regiuns (d'urari) cunfinantas e resguardads tant sco pussaivel.

La procedura d'urari ha lieu entaifer ils termins ch'il UFT ha fixà. La pussaivladad d'inoltrar ina proposta per l'urari avais Vus durant l'entir onn. Pervia dals temps da preparaziun ston propostas pli grondas vegnir inoltradas fin la fin da mars, per pudair realisar talas sin la midada da l'urari da mez december.

Survista da las presidentas e dals presidents d'urari