La Via da Samignun è ina part impurtanta da la rait da vias da colliaziun chantunalas. Ella renda accessibla la vischnanca da Samignun a partir da Vinadi ed è la suletta colliaziun da traffic en la vischnanca sin intschess svizzer. La via vegn uss amplifitgada a moda cumplessiva. Il 1. da settember 2021 cumenzan las lavurs da perfuraziun dal tunnel da la Val Alpetta ch’è var 630 meters lung. Tenor il preventiv muntan ils custs dal project d’amplificaziun cun ina lunghezza totala da 970 meters a var 28.6 milliuns francs.

Suenter avair terminà il tunnel da la Val Spelunca l’onn 1995 ed il tunnel da la Val Pischöt l’onn 2017 vegn ussa realisà il terz tunnel, quel da la Val Alpetta, en il rom da l’amplificaziun cumplessiva da la Via da Samignun. Igl è previs da dar liber il tunnel per il traffic la stad 2024. Las duas ultimas etappas cun ils proxims tunnels – Val Cotschna e Val Mundin – suondan. Per il tunnel da la Val Cotschna è il studi da variantas terminà e la decisiun è prendida. Per il tunnel da la Val Mundin vegnan fatgas actualmain las examinaziuns geologicas.

Ulteriuras infurmaziuns en l'actual Info UCB.