Grond project da via tranter Parpan e Valbella

La regenza ha dà glisch verda al project d'exposiziun per la correcziun da la via dal Güglia tranter la sortida dal vitg da Parpan e la pasternaria Stgier a Valbella. Quest traject da via è stretg, fitg disfavuraivel per cruschar cun camiuns ed utilisà fermamain dal turissem durant l'enviern. Per quests motivs vegn la via schlargiada ed equipada cun in vial da velos per il traffic betg motorisà. Ultra da quai vegnan las plazzas da fermada dal bus "Parpaner Höhe" sper la via concepidas da nov da la vischnanca da Vaz tenor ils basegns da las persunas cun impediments.

L'impuls per quest project han dà las mesiras ch'èn necessarias per la protecziun da las funtaunas tranter Parpan e Valbella. Sin tut il traject duai l'aua persa da nov vegnir rimnada consequentamain e deviada sur chinettas lateralas. L'aua da la costa e da sfundrada vegn plinavant tschiffada d'in conduct cumbinà. Ils custs totals da quest project importan circa 7,7 milliuns francs. Per il chantun resultan custs da 6,91 milliuns francs.

Augmentar la segirezza dal traffic a Lantsch

Il project d'exposiziun per la renovaziun da la via dal Güglia en il sectur da l'implant da glera Bovas a Lantsch è vegnì approvà cun intginas cundiziuns e permissiuns. Cun quest project duain vegnir schlargiadas e rinforzadas duas punts che sa chattan tranter l'implant da glera e la chaplutta da S. Cassian. Ultra da quai sto il trassé da la via vegnir concepì senza obstachels e la surstructura da la via vegnir remplazzada per motivs da segirezza.

Per augmentar la segirezza dal traffic duai plinavant vegnir construì sper la via dal Güglia in vial per sviar a sanestra al campadi S. Cassian. Pervia da quest vial e pervia da las relaziuns da visibilitad ston vegnir dischlocadas las fermadas da bus. A medem temp èsi previs d'optimar las fermadas da bus per incumbensa da la vischnanca da Lantsch tenor ils basegns da las persunas cun impediment. Ultra da quai duai vegnir construì in passadi per pedunas e peduns cun ina insla da separaziun. Il project custa circa 7 milliuns francs. La part dals custs totals ch'il chantun Grischun sto pajar importa 6,78 milliuns francs.