Pervia che l'intensitad dal traffic crescha e pervia ch'ils custs per il mantegniment e la renovaziun s'augmentan a medem temp vegn la lavur en il sectur da las vias adina pli privlusa per il persunal da mantegniment da l'uffizi da construcziun bassa . Sco reacziun sin questas cundiziuns da lavur pli difficilas vul l'uffizi da construcziun bassa dal Grischun meglierar cleramain la vesaivladad da ses vehichels durant il di e cunzunt durant la notg. Quai vegn cuntanschì cun duvrar per l'emprima giada folias che reflecteschan enavos ed elements grafics da gronda surfatscha. Il nov concept da furmaziun è vegnì elavurà ensemen cun in biro da grafica. Cumenzond cun il district 7 Tusaun vegnan marcads ils proxims 3 onns tut ils vehichels da l'uffizi da construcziun bassa tenor il nov concept. Tut tenor la regiun da servetsch vegn fatga l'inscripziun en tudestg, en rumantsch u en talian.

Las folias che reflecteschan enavos eran reservadas fin oz exclusivamain per las organisaziuns da glisch blaua sco la polizia ed ils pumpiers. A partir da quest onn ha approvà l'uffizi federal da vias (UVIAS) da duvrar questas folias er per vehichels da mantegniment. Tar quest material vegn la glisch ch'entra reflectada cleramain pli ferm e concentrada pli stretg grazia a particlas pitschnas visiblas en la surtratga, quai che augmenta considerablamain la vesaivladad dals vehichels.