Sis da las diesch vias da pass las pli autas da la Svizra sa chattan almain per part en il chantun Grischun. Per ch'ils pass da l'Umbrail, dal Flüela e.u.v. sajan puspè charrabels a partir dal matg, dovri bler temp e blera lavur. In nov video mussa ils collavuraturs da l'uffizi da construcziun bassa dal Grischun durant lur lavur pretensiusa sin il pass da l'Alvra.

Ils pass da muntogna da la Svizra tutgan tar l'identitad da la Svizra, sco las uras ed il chaschiel. Er en il Grischun è il traffic millennari sur las stortas taissas ina part integrala da la cultura. Ils pass da muntogna han er gidà a s'avischinar durant ils onns las singulas valladas e las vischnancas autonomas dal Grischun. Ils interess cuminaivels da tegnair liber las vias da sauma sco er il traffic da sauma cuminaivel han permess da sviluppar il Grischun sco unitad malgrà la diversitad culturala e malgrà la mancanza d'ina unitad geografica.

Dudesch vias da pass totalmain differentas

Entant ch'ils pass dal Bernina, dal Güglia, dal Lucmagn, dal Malögia e dal Fuorn restan averts durant l'entir onn, fan las set autras vias da pass dal Grischun in sien d'enviern il pli tard a partir dal november u dal december. Ils pass restan serrads durant l'enviern differentamain ditg. Il pass da l'Alpsu ed il pass dal Spleia pon per exempel savens vegnir averts gia la fin d'avrigl. Tar la Forcola di Livigno u tar il pass da l'Umbrail duri però fin la fin da matg u schizunt fin il cumenzament da zercladur. Ils facturs principals per il mument da l'avertura dals pass èn l'aura e l'autezza sur mar.

Cumbat cunter la naiv e cunter il temp

Per che las vias da pass possian vegnir surdadas a temp al traffic suenter ch'ellas èn stadas serradas durant l'enviern, dovri fitg blera lavur. Ils collavuraturs da l'uffizi da construcziun bassa lavuran per quai emnas a la lunga sut gronda pressiun ed a cundiziuns pretensiusas. Returns imprevis da l'enviern ed il privel da lavinas permanent fan part dal mintgadi. In nov video dat ina invista da la lavur tranter mirs da naiv da quatter meters autezza.

Infurmaziuns davart las averturas dals pass

Infurmaziuns actualas davart las singulas averturas dals pass sco er indicaziuns detagliadas davart las lavurs sin las vias ed ils impediments dal traffic pon ins consultar sin www.strassen.gr.ch.