Tranter Rueun e Tavanasa croda adina puspè giu crappa en ils secturs Uaul da Munt e Crap Leller, uschia che la via sursilvana vegn periclitada. Perquai ha la Regenza approvà il project "Protecziun cunter crudada da crappa Munt / Leller" da las vischnancas da Glion e da Breil. Ils custs da project importan circa 1,87 milliuns francs. Per proteger la via chantunala duai il territori vegnir segirà cun raits cunter crudada da crappa sin ina lunghezza totala da 585 meters.