Il project da la colliaziun traversala cun la via dal Scanvetg è vegnì approvà da la regenza grischuna. Quest project cun la punt da son Luzi prevesa in nov trassé al sid da Cuira e custa circa 58 milliuns francs. Cunquai che la finanziaziun n'è betg anc garantida, na pon anc vegnir fatgas naginas indicaziuns concretas davart il termin da realisaziun.

 La via actuala dal Scanvetg, ch'è l'access a la val cun il medem num sco er al lieu da turissem Arosa, cumenza amez la citad da Cuira. Pia sto tut il traffic en ed or dal Scanvetg charrar tras la citad, nua ch'igl è difficil per ils vehichels da cruschar pervia da las passaschas stretgas e nunsurvesaivlas. Plinavant è periclità il grond dumber da pedunas e da peduns resp. da scolaras e da scolars che traversan la via tar la curt. Ultra da quai è la via surchargiada regularmain las fins d'emna en ils secturs dal Obertor e dal Plessurquai.

Cun la finamira da distgargiar la rait da vias entaifer la citad da Cuira era vegnida tratga en consideraziun gia il cumenzament dals onns 1970 ina colliaziun directa cun ina punt tranter la via dal Güglia e la via dal Scanvetg. Il project ch'era vegnì approvà quella giada n'è dentant mai vegnì realisà.

L'onn 2006 è vegnida fatga – en il rom d'in studi da realisabladad – ina cumparegliaziun tranter ina renovaziun da la via existenta e la varianta da construir in nov trassé. Resguardond tut ils aspects essenzials ha la cumparegliaziun da las duas variantas purtà in meglier resultat per il nov trassé, e quai er areguard la persistenza. Silsuenter ha la regenza surdà l'atun 2006 l'incumbensa d'elavurar il project d'exposiziun cun in nov trassé. Quest project è stà exponì publicamain il zercladur 2008. Circa 40 posiziuns e protestas èn vegnidas inoltradas en connex cun il project. Sin basa da singulas da quellas èn vegnidas fatgas retschertgas e scleriments supplementars. Ussa, ch'ils resultats èn avant maun, ha la regenza decidì davart las singulas protestas ed ha approvà il project. La finanziaziun dal project che vegn calculà cun circa 58 milliuns francs n'è dentant betg anc garantida.

Il project è vegnì inoltrà ensemen cun la dumonda da subvenziunament a la confederaziun sco part dal project d'aglomeraziun Cuira e conturns. Suenter in'examinaziun cumplessiva n'ha la confederaziun betg dà ina gronda prioritad a la colliaziun traversala cun la via dal Scanvetg, perquai ch'il niz n'è – ord sia vista – betg suffizient en relaziun cun ils custs. Uschia na fa il project betg part da l'emprima fasa da realisaziun dals onns 2011 fin 2014.

La regenza ha adina punctuà ch'il project saja realisabel mo cun in sustegn finanzial decisiv da la confederaziun. Perquai na pon vegnir fatgas oz naginas indicaziuns liantas davart in eventual cumenzament da las lavurs da construcziun. En il rom da la segunda fasa da realisaziun vegn la regenza a s'engaschar tar la confederaziun ch'il project vegnia giuditgà da nov e puspè classifitgà en il stgalim da prioritads A.