Cun la nova lescha federala davart las persunas estras (LEst) ha la confederaziun relaschà disposiziuns che surdattan als chantuns ed a las vischnancas novas incumbensas en il sectur da l'integraziun da persunas estras. Sia finamira è quella da stgaffir cundiziuns generalas favuraivlas per l'egualitad da las schanzas e per la participaziun da la populaziun residenta estra e da promover en quest connex en spezial l'acquisiziun da la lingua, l'avanzament professiunal sco er la participaziun sociala. En quest connex duai vegnir facilitada la chapientscha vicendaivla tranter la populaziun svizra e la populaziun estra ed uschia la convivenza da tuts sin basa d'in respect vicendaivel e da toleranza.

L'integraziun è ina premissa essenziala per ina politica da migraziun che ha success. Ella s'orientescha a las suandantas directivas:

• L'integraziun è in process vicendaivel e premetta tant la prontezza da las persunas estras da s'integrar sco er l'avertadad da la societad che las recepescha.
• L'integraziun pertutga tut las persunas estras inclusiv las fugitivas ed ils fugitivs renconuschids e las persunas ch'èn admessas provisoricamain.
• L'integraziun duai pussibilitar a las persunas estras da sa participar a la vita economica, sociala e culturala.
• La promoziun da l'integraziun vegn concepida tenor il motto "pretender e promover".
• L'integraziun vegn promovida en emprima lingia en il rom da las structuras regularas.
• La promoziun da l'integraziun ordaifer las structuras regularas vegn fatga en moda subsidiara ed ha sco finamira da serrar largias en las purschidas da las structuras regularas u sa drizza a persunas che n'han nagin access a las structuras regularas.
• L'integraziun vegn promovida al lieu pertutgà sut la responsabladad primara dals chantuns e da las vischnancas.

 

Ulteriuras informaziuns pudais Vus consultar sin la pagina d'internet dal Post spezialisà per l’integraziun: www.integration.gr.ch