Dretg civil
 
I. Las autoritads da surveglianza dal stadi civil
 
A) En general
 
1. Confederaziun
 
Il stadi civil è chaussa da la confederaziun. L'uffizi federal dal stadi civil en il departament federal da giustia e polizia è l'autoritad federala da surveglianza.
 
2. Chantun
 
Mintga chantun sto nominar sia atgna autoritad da surveglianza. En questa funcziun ha l'uffizi da migraziun e da dretg civil dal Grischun la surveglianza dals uffizis da stadi civil dal Grischun. El sto prender tut quellas disposiziuns e dar tut quels cumonds che l'ordinaziun federala davart il stadi civil surdat a l'autoritad chantunala da surveglianza.
 
B) Servetschs ed incumbensas
 
Surveglianza e garanzia da la qualitad
 
L'uffizi instruescha las persunas che lavuran en il servetsch da stadi civil, fa regularmain inspecziuns da las documentaziuns publicas ed examinescha l'execuziun fidada da las incumbensas en ils singuls uffizis da stadi civil.
 
El sustegna e cusseglia las funcziunarias ed ils funcziunaris da stadi civil en dumondas specificas davart la documentaziun publica (support dal 1. nivel).
 
El ordinescha correcturas ed extincziuns da datas davart il stadi civil en documentaziuns publicas, uschenavant che talas tutgan tar las cumpetenzas da las autoritads da stadi civil.

Documents esters
 
L'uffizi examinescha ils documents e dispona la documentaziun publica da cas da stadi civil ch'èn succedids a l'exteriur.
 
Examinaziun dals documents da stadi civil
 
En cas da l'inscripziun da persunas estras en il register da stadi civil (Infostar) è l'uffizi cumpetent per examinar ils documents esters. El fixescha en tge cas ch'i sto vegnir preschentà documents esters per l'examinaziun.
 
Permissiun da communitgar datas persunalas dals registers da stadi civil
 
L'uffizi examinescha las dumondas da persunas privatas e da perscrutadras e perscrutaders e dat la permissiun da communitgar datas persunalas – en cas singuls er da prender invista dals registers.
 
II. L'uffizi da stadi civil
 
A) En general
 
L'uffizi da stadi civil è il post da consultaziun per persunas ch'èn confruntadas cun in eveniment che pertutga il stadi civil u che dovran in document da stadi civil. En il chantun Grischun è l'uffizi da stadi civil suttamess organisatoricamain als circuls (a partir dal 1. da schaner 2016 a las regiuns) u – en cas da plirs circuls – a la cumissiun ch'è cumpetenta per tals.
 
Tge uffizi da stadi civil è (per regla) cumpetent per tge?
 
L'uffizi da stadi civil al lieu da l'eveniment resp. al lieu da la decisiun
 ► documentaziun publica d'eveniments natirals: naschientscha, mort
 ► documentaziun publica da la sentenzia giudiziala (divorzi, constataziun da la relaziun da figlialanza) u da la decisiun da l'autoritad (midada dal num)
 
L'uffizi da stadi civil ch'è cumpetent per il lieu da domicil$
 ► procedura da preparaziun da la lètg
 ► inscripziun (documentaziun publica dal stadi civil) da persunas estras
 
In uffizi da stadi civil tenor libra tscherna en Svizra
 ► maridaglia
 ► prender encunter decleranzas concernent il num
 ► renconuschientscha d'uffants
 ► mandat preventiv (constituziun e lieu da deposit, midada, extincziun)

L'uffizi da stadi civil al lieu d'origin
 ► natiralisaziuns
 ► documentaziun publica d'eveniments a l'exteriur, sche burgaisas svizras e burgais svizzers èn pertutgads
 ► inscripziun d'ina curatella cumplessiva e l'aboliziun da quella
 
B) La funcziunaria u il funcziunari da stadi civil
 
La funcziunaria resp. il funcziunari da stadi civil è cumpetenta resp. cumpetent per documentar publicamain il stadi civil d'ina persuna (naschientscha, mort, lètg, partenadi registrà), las relaziuns da dretg da famiglia (relaziun tranter geniturs ed uffants) ed il dretg da burgais.
 
Ina premissa per questa lavur è il certificat professiunal federal per funcziunarias e per funcziunaris da stadi civil. Il titel "funcziunaria da stadi civil cun diplom federal" u "funcziunari da stadi civil cun diplom federal" ch'ins survegn è protegì ed autorisescha da manar independentamain in uffizi da stadi civil. Per vegnir admessa u admess a l'examen professiunal, vegnan premess 2 onns pratica en il sectur dal stadi civil. La scolaziun è structurada en moda modulara: modul da basa – moduls da certificaziun – curs preparatoric per l'examen professiunal.
 
C) Ils registers da stadi civil
 
L'onn 2003 è vegnì introducì il register electronic da stadi civil (Infostar). La documentaziun publica legalmain valaivla da las datas davart il stadi civil ha lieu dapi lura exclusivamain en quest register. Ils registers che vegnivan manads fin lura sin palpiri sco ils registers da las naschientschas, ils registers matrimonials ed ils registers dals mortoris, ils registers da las burgaisas e dals burgais ed ils registers da famiglia vegnan administrads vinavant dals uffizis da stadi civil. Tuts dus, il register electronic ed il register sin palpiri, furman ensemen il register da stadi civil.
 
Tras il register electronic Infostar èn tut ils uffizis da stadi civil da la Svizra colliads in cun l'auter. La cumpetenza per la documentaziun publica ha dentant anc adina l'uffizi da stadi civil al lieu da l'eveniment resp. da la consegna d'ina decleraziun.
 
D) Extracts dals registers da stadi civil
 
I pon vegnir retratgs documents per cumprovar
 - la documentaziun publica d'in eveniment
 - il stadi civil actual
 - las relaziuns famigliaras actualas
 - il dretg da burgais chantunal e communal d'ina persuna.
 
Documents davart in eveniment ch'è inscrit en il register da stadi civil (naschientscha, maridaglia, renconuschientscha d'in uffant, midada dal num e.u.v.) vegnan emess da l'uffizi da stadi civil che ha fatg la documentaziun publica da l'eveniment.
 
L'attest da stadi civil per burgaisas svizras e per burgais svizzers vegn emess da l'uffizi da stadi civil dal lieu d'origin, la conferma davart il stadi civil registrà d'ina persuna estra da l'uffizi da stadi civil dal lieu da domicil.
 
L'attest da famiglia u l'attest da partenadi vegn emess da l'uffizi da stadi civil che ha fatg la documentaziun publica da l'ultim eveniment areguard il stadi da famiglia. Burgaisas svizras e burgais svizzers pon er retrair quest document dal lieu d'origin. – L'attest davart il stadi civil registrà po vegnir retratg da l'uffizi da stadi civil dal lieu d'origin da la burgaisa svizra u dal burgais svizzer resp. da l'uffizi da stadi civil dal lieu da domicil da la persuna estra.