Tenor ils studis ils pli actuals da l'Uffizi federal da sanadad publica (UFSP) han ca. 543 000 persunas prestà lavur gratuita per persunas che basegnan tgira l'onn 2017 en Svizra. Stgars 330 000 da quellas, pia dus terzs, pratitgeschan ina professiun.
Per il chantun Grischun èsi da far quint proporziunalmain (cun ina part da la populaziun da 2,4 pertschient) cun passa 13 000 persunas che s'occupan en ina furma u l'autra d'ina persuna che basegna tgira.
Pauc dapli che la mesadad da las persunas che assistan e tgiran lur confamigliars èn dunnas (54,3 %). En media han ellas 54 onns. La gruppa da persunas la pli gronda en la tgira da confamigliars èn uffants creschids che tgiran ed assistan lur geniturs. Suenter suondan conjugals che tgiran u assistan lur partenaria resp. lur partenari sco er geniturs che surpiglian questas incumbensas a favur da lur uffants malsauns. En il cas extrem surpiglian uffants u giuvenils l'incumbensa d'assistenza. Ins discurra lura er da "Young Carers". Stgars dus terzs da las persunas creschidas che assistan lur confamigliars han in'activitad da gudogn. Ina gronda part dals confamigliars che assistan cun ina gronda intensitad da tgira, lavura parzialmain. La cumpatibilitad da l'activitad da gudogn cun l'assistenza è in tema impurtant.
Tut las cifras en connex cun la tgira ed assistenza da confamigliars chattais Vus en il studi da l'Uffizi federal da sanadad publica (UFSP).
En media dura l'assistenza da persunas che basegnan tgira tras lur confamigliars 6 onns. Tenor il studi da l'Uffizi federal da sanadad publica (UFSP) stattan en il center incumbensas administrativas, che vegnan suandadas da la coordinaziun e da la planisaziun sco er da l'agid en il mintgadi ed en il tegnairchasa.
Dapli che la mesadad dals confamigliars interrogads dal UFSP han inditgà ch'els tgirian ed assistian durant main che 10 uras per emna. Stgars 20 % han inditgà in temp impundì per emna da 10 fin 20 uras. 6 % han inditgà in temp impundì da 21 fin 30 uras e 4 % han ditg ch'els assistian durant 31 fin 40 uras. Occupads di e notg cun l'incumbensa d'assistenza èn 8 % (guardar er: Rapport final "Basegns e necessitad da persunas che assistan lur confamigliars").
Sch'ins lavura a temp cumplain, è gia in'assistenza da 10 uras per emna ina sfida immensa. Tant pli impurtant èsi da prender regularmain congedis e da tschertgar sustegn per restar sez saun.
En tut la Svizra han confamigliars prestà l'onn 2013 var 64 milliuns uras da tgira ed assistenza. Quai ha mussà in studi da la Federaziun svizra da spitex. Sche questas uras stuessan vegnir pajadas, custass quai ca. 3,5 milliardas francs. Quai chaschunass in augment massiv dals custs en il sectur da sanadad. La Confederaziun ed ils chantuns èn conscients da questa lavur betg pajabla. Cun lur plans d'acziun vulan els stgaffir meglras cundiziuns generalas e sustegnair sco er distgargiar a lunga vista ils confamigliars.