Bleras lavurantas e blers lavurants taschentan a lur patruns, sch'ellas u els s'engaschan per confamigliars. Pir cur che la lavur vegn disturbada u cur ch'els vulan u ston reducir il pensum da lavur, discurran els davart il tema. Ma savens èsi pli difficil da chattar soluziuns a curta vista. Discurri perquai a temp cun Vossa superiura u cun Voss superiur ubain cun la partiziun da persunal.
Per il mument na datti per uschè dir naginas disposiziuns legalas che reglan l'absenza a la plazza da lavur da persunas che tgiran lur confamigliars. Quai vala er per la cuntinuaziun dal pajament dal salari. La Confederaziun elavura actualmain in sboz da lescha per conceder in congedi da tgira, per conceder bunificaziuns da tgira da la AVS sco er per adattar il dretg d'ina indemnisaziun a persunas dependentas d'agid ed in supplement da tgira intensiva.
Il program «Work & Care» porscha ina plattafurma per lavurantas e lavurants sco er per patruns che dovran meds d'agid ed infurmaziuns davart il tema cumpatibilitad da l'activitad professiunala cun la tgira ed assistenza da confamigliars.
Qua chattais Vus cussegls ed instruments pratics.
Sche Vus tschertgais ina cussegliaziun areguard la cumpatibilitad da l'activitad professiunala cun la tgira ed assistenza da confamigliars, As infurmai tar Vossa superiura u tar Voss superiur ubain tar il servetsch da persunal davart in post da cussegliaziun intern. Tscherts patruns porschan er cussegliaziuns socialas spezialas entaifer lur manaschi. Sche Vus n'avais nagina pussaivladad da cussegliaziun entaifer il manaschi, pudais Vus As laschar cussegliar tar il Center UND. UND è in'organisaziun che vegn sustegnida da la Confederaziun e che s'engascha per la cumpatibilitad da la professiun e da la lavur da famiglia. Tranter auter porscha ella servetschs da cussegliaziun subvenziunads per persunas privatas
BUN DA SAVAIR:
|
|
Las mammas, da las qualas ils uffants ston star pli che 3 emnas suenter la naschientscha en l'ospital, duain avair en l'avegnir pli ditg il dretg d'ina indemnisaziun en cas da maternitad. La Lescha davart l'urden da cumpensaziun dal gudogn (LCG) prevesa gia oz da sistir il dretg d'ina indemnisaziun en cas da maternitad, sch'il novnaschì sto star directamain suenter la naschientscha pli che 3 emnas en l'ospital.
Infurmaziuns e sboz tar ina midada da la Lescha davart l'urden da cumpensaziun dal gudogn chattais Vus tar l'Uffizi federal d'assicuranzas socialas UFAS.
|
Regulaziun d'absenzas curtas
En la Lescha da lavur (art. 36 al. 3 LL) è fixà ch'in genitur po star a chasa fin 3 dis per tgirar in uffant malsaun, sch'el preschenta in attest dal medi e sche l'uffant dovra assistenza per motivs da sanadad. Actualmain vala quai dentant mo per geniturs cun uffants fin 15 onns.
La nova lescha federala prevesa d'extender il dretg d'absenzas da curta durada pervia da malsogna u pervia d'accidents da commembers da la famiglia sin persunas creschidas parentas e proximas.
Regulaziun d'absenzas pli lungas e da congedis da tgira
Ina regulaziun per absenzas pli lungas datti oz sulettamain per geniturs che tgiran lur uffants grevamain malsauns.
La nova lescha federala ch'il Cussegl federal ha surdà l'onn 2019 al parlament, regla in congedi da tgira pajà da maximalmain 14 emnas per geniturs d'uffants grevamain malsauns u disgraziads. La perdita da salari vegniss garantida tras la Lescha davart l'urden da cumpensaziun dal gudogn (sco il congedi da maternitad u la perdita da salari da persunas che prestan servetsch militar).
BUN DA SAVAIR:
|
Mesiras da sustegn propi a lunga vista datti oz sulettamain per geniturs d'uffants cun ina menda da naschientscha renconuschida. En quests cas indemnisescha l'assicuranza d'invaliditad (AI) prestaziuns da la spitex d'uffants en il rom dal tractament e da la tgira.Plinavant paja la AI indemnisaziuns a persunas dependentas d'agid per persunas minorennas sco er supplements per la tgira intensiva, che vegnan fixads en moda pauschala e che na dependan betg d'entradas da gudogn. Questas prestaziuns vegnan pajadas per regla pir suenter 1 onn, cur ch'igl è cumprovà, che la dependenza d'agid dura vinavant. Ultra da quai pon geniturs dumandar ina contribuziun d'assistenza, sch'els engaschan ina
terza persuna per la tgira da lur uffant. |
Soluziun individuala
Independentamain da quai, sche Vus quintais cun ina absenza da curta u da lunga durada pervia da la tgira ed assistenza d'in confamigliar: As infurmai tar la partiziun da persunal da Voss patrun, sch'i vegn concedì in congedi d'assistenza u da tgira. Intginas interpresas porschan en il fratemp in congedi da tgira da fin 14 dis.
Dumandai er anc suenter soluziuns individualas. Savens gidan temps da lavur flexibels u la pussaivladad da lavurar per in tschert temp davent da chasa. Intgins patruns èn fitg culants.
La plattafurma info-workcare porscha instruments utils per soluziuns individualas:
BUN DA SAVAIR:
|
Dumandai bunificaziuns da tgira. Quellas stattan a disposiziun per la tgira da persunas dependentas d'agid d'almain in grad mesaun. Uschia po l'atgna renta vegnir "augmentada",
resp. la largia da la AVS che resulta pervia da la reducziun dal pensum da lavur po vegnir
gulivada.
|