Sche nus restain u daventain sauns, dependa da noss cumportament e da noss stil da viver individual. Decisivs èn plinavant ils conturns, en ils quals nus creschin si e vivain. Perquai porschan las vischnancas puncts da partenza multifars per rinforzar la sanadad da la populaziun.

Tge po ina vischnanca far?

Las vischnancas pon influenzar activamain la sanadad da lur populaziun. Ellas preparan il terren per crescher si en moda sauna e per ina vita uschè lunga ed autodeterminada sco pussaivel per lur populaziun cun:

• encuraschar la populaziun da trair a niz e da mobilisar optimalmain sias resursas individualas e socialas;
• promover raits da relaziuns vivas tranter las abitantas ed ils abitants;
• concepir il spazi public uschia, che moviment ed inscunters vegnan promovids;
• promover purschidas da cussegliaziun, d'assistenza e da temp liber en ina buna qualitad grazia a cundiziuns generalas optimalas;
• prender en mira ina scola che promova la sanadad;
• integrar la promoziun da la sanadad e la prevenziun en ils models directivs ed en ils concepts u en las strategias.