Purschida da sport e da gieus per famiglias en las vischnancas

La halla da gimnastica averta per uffants è ina purschida da moviment e d'inscunter nunbirocratica ed averta en las vischnancas.

Durant uras fixas èn las salas da gimnastica avertas per uffants e per famiglias, savens durant ils mais d'enviern e la dumengia avantmezdi. Giugar, sa divertir, sa mover e s'inscuntrar, quai è il motto da questa purschida bain accessibla. I n'è betg necessari da s'annunziar e tut ils uffants en la vegliadetgna da la scola primara èn bainvegnids. Durant la purschida èn ils geniturs responsabels per la surveglianza da lur uffants.

La purschida Halla da gimnastica averta per uffants vegn accumpagnada d'ina persuna creschida dal lieu. Per las manadras ed ils manaders ha lieu mintga onn ina furmaziun supplementara.

Gruppa/s en mira

Vischnancas, uniuns da famiglia, uffants

Finamiras dal project

Las dumengias durant ils mais d'enviern han ils uffants e las famiglias in lieu per sa sfugar, per giugar e per chattar novs contacts socials.

Ils uffants pon gidar a concepir il program.

Las vischnancas han ina purschida attractiva per famiglias ed uffants.

Cuntegns da la purschida

• Cussegliaziun e sustegn da las instituziuns purtadras
• Contribuziuns da sustegn a las instituziuns purtadras tras il Post spezialisà per la promoziun da la sanadad
• Inscunters da barat per las manadras ed ils manaders
• Mintga onn furmaziuns supplementaras per las manadras ed ils manaders

Cundiziuns generalas

• Il project sa drizza ad uffants e famiglias che abitan en la vischnanca u en la regiun
• Il project è nunbirocratic e gratuit per las participantas ed ils participants
• Il project vegn accumpagnà d'ina persuna creschida
• La halla da gimnastica averta per uffants vegn organisada almain tschintg giadas per stagiun.
• Il project vegn cofinanzià da la vischnanca/da l'instituziun responsabla u da terzas persunas.
• Realisaziun da la purschida senza drogas