Per dapli moviment ed ina cultura da mangiar sauna en il mintgadi da scola

Cun il project «Scola en moviment» survegnan ils uffants avunda spazi per viver lur basegn natiral da sa mover, per rimnar experientschas positivas da moviment e per sa nutrir en moda equilibrada, e quai er ordaifer l'instrucziun da sport. Il moviment è in element essenzial da la cultura da scola sauna e promova la concentraziun, la sanadad e la prestaziun. «Scola en moviment» cumpiglia in pachet da mesiras cumplessiv che includa l'entira scola. La fasa da project dura var in 1,5 onns, la finamira è ina francaziun a lunga vista. L'andament sa preschenta en moda flexibla, tut tenor il basegn e tenor l'organisaziun da la scola. Il decurs adattà vegn discutà en in emprim discurs cun la direcziun da la scola e/u cun la(s) persuna(s) d'instrucziun responsabla(s).

Gruppa/s en mira

Direcziuns da scola e persunas d'instrucziun

Finamiras dal project

Las persunas d'instrucziun èn conscientas da l'influenza ch'il moviment ed in nutriment equilibrà han sin la concentraziun e sin la capacitad da prestaziun da las scolaras e dals scolars.

Ellas enconuschan elements da moviment adattads a la vegliadetgna e variads ed als applitgeschan durant l'instrucziun e durant la pausa.

La scola (stanza da scola, corridors, plazza da pausa e.u.v.) è endrizzada uschia, ch'ella promova il moviment.

Las scolaras ed ils scolars fan l'experientscha che moviment fa plaschair e ch'ina alimentaziun equilibrada gusta. En il mintgadi da scola pon ellas ed els sa mover suffizientamain.

Er ils geniturs èn sensibilisads per in moviment regular e per in nutriment equilibrà.

Cuntegns da la purschida

• Ina furmaziun supplementara d'in entir di en il collegi (p.ex. cun Pädi Fust), finanziada dal Post spezialisà per la promoziun da la sanadad
• Coaching da la promotura u dal promotur tenor basegn
• Sustegn finanzial: Il Post spezialisà per la promoziun da la sanadad sustegna finanzialmain las scolas cun ina contribuziun unica da 2000 fin 4000 francs (tut tenor la grondezza da la scola) per acquistar material da moviment per l'instrucziun e per las pausas
• Material d'infurmaziun per persunas d'instrucziun e per geniturs
• Access a furmaziuns supplementaras cun in connex tematic (p.ex. sur la SAPGR)
• Newsletter «Promoziun da la sanadad en scola»
• Commembranza tar la rait da scolas21

Cundiziuns generalas

• Ina persuna d'instrucziun vegn nominada sco promotura u sco promotur, ella maina il project e tgira ils temas. Durant la fasa da project vegn ella en il cas ideal sustegnida d'ina gruppa da project
• Ina maioritad da las commembras e dals commembers da la scola declera da s'engaschar per ch'il project reusseschia (realisar durant l'instrucziun, sa barattar regularmain en las structuras existentas, e.u.v.) e da francar en il mintgadi da scola las mesiras che portan success
• Furmaziun supplementara entaifer la scola (p.ex. cun Pädi Fust)
• Occurrenza per geniturs ed occurrenza iniziala en la scola
• Francaziun a lunga vista (p.ex. en il model directiv da la scola)