Surdinas per ir a chatscha en il Grischun

Cun l'entrada en vigur da la revisiun da l'Ordinaziun federala da chatscha (OChP) il 1. da favrer 2025 na valan surdinas betg pli sco meds auxiliars scumandads per la chatscha. L'onn 2025 vegnan plinavant er las Prescripziuns da chatscha dal Grischun adattadas a l'Ordinaziun da chatscha, quai che permetta da duvrar surdinas per la chatscha en il chantun Grischun.

Per l'acquist d'ina surdina dovri er en l'avegnir ina permissiun, concretamain ina permissiun excepziunala chantunala per accessoris d'armas. Sche e cura che la Confederaziun adattescha u concepescha explicitamain da nov ina dumonda correspundenta, n'è anc betg enconuschent.

Dumonda actuala per surdinas

Novaziuns areguard l'extract dal register penal

Dapi ils 23-01-2023 na sto la petenta u il petent betg pli agiuntar in extract privat dal register penal svizzer ad ina dumonda en il sectur da dretg d'armas.

Annunzias e dumondas sin la plattafurma online Suisse ePolice

La plattafurma online Suisse ePolice po en il fratemp er As servir per transmetter u per dumandar contracts en scrit u permissiuns d'acquistar armas dentant er permissiuns excepziunalas chantunalas en il sectur da las armas. Per quest intent stuais Vus mo crear in conto persunal sin Suisse ePolice.

Sche Vus, sco persuna privata, As decidais per Suisse ePolice, vulessan nus As supplitgar da suandar las infurmaziuns sin Suisse ePolice durant il process da transmissiun. Suttastritgai ils documents suenter la supplica da far quai avant d'als agiuntar ad in ulteriur process da transmissiun ed avant da cliccar sin il buttun da trametter definitiv.

Ina pretensiun (sco p.ex. ina permissiun d'acquistar armas) u ina transmissiun (sco p.ex. in contract en scrit) sur Suisse ePolice premetta che Vus hajas access ad in stampader resp. ad in scanner. Per armas da fieu a seria e/u per auters eveniments u per transferiments pli cumplitgads As supplitgain nus d'eleger la via uffiziala en scrit u per telefon al Post spezialisà per armas.