« enavos
Prevenziun e tips per la segirezza
La segirezza tutga tar ils basegns elementars essenzials da l'uman ed è ina part impurtanta da la qualitad da viver. La prevenziun da la criminalitad cumpiglia tut las incumbensas che la polizia po realisar a moda autonoma. La finamira principala è da reducir las chaschuns per commetter delicts.
La prevenziun da la criminalitad presta cun quai ina contribuziun fundamentala per promover il sentiment da segirezza. Ella cumpiglia tut ils programs statals e privats e mesiras che duain prevegnir a la criminalitad e gidar a minimar u sminuir quella sco fenomen da la societad u era sco eveniment singul.
La prevenziun da la criminalitad è in'incumbensa che cumpiglia l'entira societad. Satisfar a quella pon ins mo cun ina strategia persistenta ed in concept general cumplessiv ed integrativ. Per realisar quai ston ultra da la polizia era la politica ed auters posts statals e betg statals, l'economia, las medias e la populaziun prestar ina contribuziun.
Cussegliaziun da segirezza gratuita
Enguladitschs, infracziuns, engion u violenza – nossa cussegliaziun da segirezza As dat tips davart il cumportament correct e la prevenziun da crims.
Infracziun
Laptops, daner blut, bischutaria, material da bajegiar, vin, velos, cigarettas, etc.: ladras e laders han en mira fitg differents objects da valur. Els sa cumportan uschè discret sco pussaivel e vegnan lura cura che nagin n'è pli là. Infracziuns èn in dals delicts commess il pli savens en Svizra. La Prevenziun svizra da la criminalitad cusseglia perquai da sa fatschentar cun il tema da l'infracziun, independentamain sch'ins è possessur u possessura d'ina chasa, locatari u locataria, cunabitanta u cunabitant d'ina cuminanza d'abitar u mainagestiun d'ina interpresa pitschna u mesauna.
La statistica criminala da la polizia mussa per l'onn 2022 in ferm augment da las infracziuns en abitaziuns. Ina raschun è probablamain la fin da las restricziuns da corona che pudess esser responsabla ch'i dat puspè dapli chaschuns.
Dapli davart la statistica.
La Polizia chantunala dal Grischun cusseglia en dumondas da la protecziun cunter infracziuns:
- Bleras infracziuns pon ins evitar cun il cumportament correct, la tecnica da segirar correcta e cun vischins attents.
- Las collavuraturas ed ils collavuraturs dal post da prevenziun cusseglian Vus a moda gratuita ed individuala davart la protecziun cunter infracziun.
- Saja quai per s'infurmar davart schliaziuns tecnicas, reglas da cumportament segiras u simplamain per survegnir intgins tips: las spezialistas ed ils spezialists da la prevenziun criminala As cusseglian gugent er al lieu. Temp: ca. 90 minutas.
As interessais Vus per questa purschida gratuita u avais Vus dumondas? Ans contactai: telefon 081 257 75 40 u e-mail praevention(at)kapo.gr.ch
Dapli dal tema "Infracziun":
Prevenziun svizra da la criminalitad (PSC)
Abitar segir en Svizra
telechargiar broschuras davart il tema "protecziun d'infracziun"
Enguladitschs
Ladras e laders chaschunan en Svizra mintga di gritta, ravgia e tristezza. Engulads vegnan velos u autos, smartphones e laptops, bursas ed apparats da fotografar, ma era maschinas da construcziun, animals da chasa ed entiras valischs. Tut quai che n'è betg enguttà, po vegnir engulà. Perquai èn ina disfidanza sauna ed ina tscherta vigilanza la meglra protecziun encunter quels da las griflas lungas.
Dapli dal tema "Enguladitschs":
Prevenziun svizra da la criminalitad (PSC)
Cugliunaria per telefon – Tge è in telefonat da schoc?
In telefonat da schoc è ina furma spezialmain agressiva da cugliunarias per telefon che sa derasa pli e pli ferm. Tar in telefonat da schoc survegnis Vus in telefon e vegnis confruntada u confruntà cun ina novitad inventada che tuna dentant credibla e che duai schoccar Vus: Il pli savens vegn pretendì ch'in confamigliar saja en ina situaziun d'urgenza u en grond privel. Il medem mument vegn pretendì che Vus possias mitigiar la situaziun d'urgenza resp. impedir il grond privel cun surdar – uschè svelt sco pussaivel! – daners u objects da valur ad ina curriera u in currier. Cunquai che Vus na pudais pervi dal schoc betg pensar a moda raziunala e vulais natiralmain gidar Voss confamigliar e vegnis mess u messa sut squitsch, èsi fitg probabel che Vus ademplis la pretensiun e realisais pir pli tard ch'ins ha cugliunà Vus.
Dapli dal tema "Cugliunaria per telefon":
Prevenziun svizra da la criminalitad (PSC)
Cugliunaria
Ch'i vegn cugliunà en la rait cun tut ils trics e rampigns pussaivels, è entant enconuschent. Per ch'ina persuna daventia in'unfrenda sto ella logicamain sa laschar cugliunar e quai capita bler pli svelt, sch'i dat da princip ina prontezza da vulair crair a questa offerta surmananta. Questa prontezza pli gronda po resultar d'ina mancanza finanziala, d'ina mancanza da prestige u betg sco ultim d'ina mancanza d'affecziun corporala u spiertala.
Dapli dal tema "Cugliunaria":
Prevenziun svizra da la criminalitad (PSC)
Diever abusiv
En ils pli blers cas da diever abusiv sa sentan las persunas engianadas e cugliunadas. Sch'ellas ston tuttenina pajar per ina prestaziun apparentamain gratuita u bunmartgada in bun tant dapli che la summa oriunda, èn ellas savens da l'opiniun ch'ins haja cugliunà ellas en il senn penal. Ma en connex cun il diever abusiv ageschan ils purschiders e las interpresas savens entaifer il rom legal, era sch'els sa cumportan a moda illoiala.
Dapli dal tema "Diever abusiv":
Prevenziun svizra da la criminalitad (PSC)
Skimming
Grazia a la prevenziun sistematica da skimming en cumbinaziun cun in'infrastructura meglierada per pajaments han ins pudì sbassar massivamain il dumber da cugliunarias cun cartas. Tuttina resta il privel da daventar in'unfrenda da skimming vinavant, en spezial a l'exteriur. En blers cas profiteschan ils cugliunaders da la disfidanza mancanta e dal quità manglus da lur unfrendas.
Dapli dal tema "Skimming":
Prevenziun svizra da la criminalitad (PSC)
Las suandantas offertas purschain nus en connex cun enguladitschs, cugliunaria da telefon/cugliunaria/diever abusiv/skimming:
referat "segirezza en la vegliadetgna", enguladitsch ord tastga ed enguladitsch da rampigns, fenomens "enguladitsch cun rampign da biadi, telefonat da schoc, policist fauss" ed agid da buna vischinanza. Per senioras e seniors.
temp: tenor cunvegnientscha
As interessais Vus per in da quests servetschs u avais Vus ina dumonda? Ans contactai: telefon 081 257 75 40 u e-mail praevention(at)kapo.gr.ch
Abus sexual
Funtauna: PSCAbus sexual da persunas creschidas
Abus sexual po capitar dapertut en la societad ed en ils pli differents contexts. Perquai èsi impurtant che la prevenziun vegnia fatga a moda sistematica tenor las gruppas en mira (delinquents potenzials e victimas potenzialas) ed era differenziada tenor la constellaziun. Betg a tuttas furmas na pon ins dar las medemas recumandaziuns, perquai numnain nus las differentas furmas singulas.
Dapli dal tema "Abus sexual da persunas creschidas":
Prevenziun svizra da la criminalitad (PSC)
Abus sexual d'uffants
Ils pli blers cas d'abus d'uffants capitan en il stretg conturn social. Ils delinquents èn savens parents, amis da la famiglia, persunas d'instrucziun u trenaders e perquai enconuschents als uffants. Il delinquent ester che rapina in uffant cumplainamain nunenconuschent per explotar quel sexualmain datti fitg darar. Blers crain dentant che questa gruppa fitg pitschna da delinquents esters è la gruppa «tipica» da pedocriminals.
Dapli dal tema "Abus sexual d'uffants":
Prevenziun svizra da la criminalitad (PSC)
Pornografia illegala
«E-commerce = P-commerce!» hai gì num a l'entschatta dal temp dal consum online ed ins manegiava cun quai il fatg che surtut pornografia vegnia vendida, cumprada e consumada en la rait. Sche quai era propi la sparta da vendita principala, laschain nus avert. Che la purschida da pornografia creschida dentant marcantamain e che l'access è vegnì bler pli simpel, è indiscutabel. Perquai èsi daventà pli impurtant d'enconuscher la situaziun legala enturn il tema pornografia. Tgi che enconuscha las leschas po proteger sasez ed auters d'agir a moda malponderada e da sa far culpabel, ed ella u el po era giuditgar meglier, cura ch'i dovra l'agid da la polizia.
Dapli dal tema "Pornografia illegala":
Prevenziun svizra da la criminalitad (PSC)
Internet
maletg simbolic5 pass per Vossa segirezza digitala
Protegi perquai Vossas datas e Voss apparats cun ils «5 pass per Vossa segirezza digitala»:
- pass 1: proteger las datas
- pass 2: survegliar cun protecziun da virus e firewall
- pass 3: prevegnir cun updates da la software
- pass 4: proteger ils access online
- pass 5: far attenziun ed esser attentiv
Il prospect «5 Schritte für Ihre digitale Sicherheit» è vegnì realisà en collavuraziun cun «eBanking – aber sicher!» e declera en tschintg pass tge princips ch'èn da resguardar per proteger sasez e l'atgna infrastructura d'IT a moda simpla ed effizienta da cybercriminals.
Dapli dal tema "Segirezza digitala":
Prevenziun svizra da la criminalitad (PSC)
Fraud sin martgads online
Il commerzi cun rauba nova e duvrada, vehichels ed immobiglias tranter persunas privatas ha lieu oz surtut sin martgads online. Era sche las transacziuns capitan per il pli senza problems, datti era cas da fraud sin ils martgads online. Sche las modas da proceder dals criminals vegnan enconuschentas, pon persunas pertutgadas identifitgar ed impedir gia baud in'emprova da fraud.
Dapli dal tema "Fraud sin martgads online"
Prevenziun svizra da la criminalitad (PSC)
Romance scam
Tgi che vul s'inamurar ozendi chatta en l'internet ina schelta infinita da prinzis e princessas da paraulas da l'entir mund. Ma attenziun! Cors fomentads èn averts per cumpliments ed engiraments d'amur che na ston insumma betg adina esser serius. Tals cors averts vegnan nizzegiads ora a moda sistematica da cugliunadras e cugliunaders per s'enritgir finanzialmain.
Dapli dal tema "Romance scam":
Prevenziun svizra da la criminalitad (PSC)
Cybermobing
La maioritad dals giuvenils ha ozendi access a l'internet. Blers dad els portan cun els l'internet en furma da lur smartphone quasi en il satg da las chautschas. Era sche nagina generaziun avant els n'è stada uschè famigliarisada cun il mund digital, ston ils geniturs e las persunas d'instrucziun avertir ils giuvenils dals privels e da las sfidas da l'internet. Cybermobing è in tal privel. Tgi che sa bler davart il tema cybermobing na po betg mo gidar d'impedir attatgas da cybermobing, mabain era reagir endretg en cas ch'ella u el vegn sezza u sez en contact cun cybermobing.
Dapli dal tema "Cybermobing":
Prevenziun svizra da la criminalitad (PSC)
Sextorsiun
L'internet porscha numerusas pussaivladads da sa barattar cun persunas da tut il mund a moda nunlianta e senza indicaziuns da nums ed adressas en scrit, via telefonia d'internet u videochat. Il fenomen sextorsiun mussa ch'in barat nunliant, anonim en l'internet suonda en tscherts cas en vardad in plan criminal che chaschuna tar las unfrendas la tema da vegnir blamadas davant la famiglia, ils amis e nunenconuschents. Savens n'essan nus online numnadamain betg da viadi uschè anonim sco nus pensain.
Dapli dal tema "Sextorsiun":
Prevenziun svizra da la criminalitad (PSC)
Money mules
Criminals tschertgan sur diversas plattafurmas online, via medias socialas u inserats da gasetta «money mules» (asens da daners), dals quals els pon nizzegiar ils contos bancars per transferir lur daners gudagnads a moda delictuala. Las annunzias pledentan savens persunas ch'èn a la tschertga da lavur u ch'èn en stretgas finanzialas. Ma qua èsi da far attenziun. Tgi che sa lascha numnadamain engaschar sco «asen da daners» cuntrafa a la lescha.
Dapli dal tema "Money mules":
Prevenziun svizra da la criminalitad (PSC)
Phishing
Per nizzegiar l'internet cun sias pussaivladads, ston las utilisadras ed ils utilisaders adina puspè inditgar tschertas datas persunalas. Questa necessitad maldovran criminals cun engular nossas datas persunalas u cun empruvar cun dal tut ils trics da far tradir nossas datas persunalas.
Dapli dal tema "Phishing":
Prevenziun svizra da la criminalitad (PSC)
Hacking e malware
L'utilisaziun da l'internet porta era privels. Malware po chaschunar enorms donns sco la perdita da datas u interrupziuns da servetschs per utilisadras ed utilisaders privats sco era interpresas. Cun respectar tschertas reglas da cumportament en cumbinaziun cun mesiras tecnicas pon ins proteger las atgnas datas d'attatgas da hacking.
Dapli dal tema "Hacking e malware":
Prevenziun svizra da la criminalitad (PSC)
Pornografia illegala
«E-commerce = P-commerce!» hai gì num a l'entschatta dal temp dal consum online ed ins manegiava cun quai il fatg che surtut pornografia vegnia vendida, cumprada e consumada en la rait. Sche quai era propi la sparta da vendita principala, laschain nus avert. Che la purschida da pornografia creschida dentant marcantamain e che l'access è vegnì bler pli simpel, è indiscutabel. Perquai èsi daventà pli impurtant d'enconuscher la situaziun legala enturn il tema pornografia. Tgi che enconuscha las leschas po proteger sasez ed auters d'agir a moda malponderada e da sa far culpabel, ed ella u el po era giuditgar meglier, cura ch'i dovra l'agid da la polizia.
Dapli dal tema "Pornografia illegala":
Prevenziun svizra da la criminalitad (PSC)
Violenza
Funtauna: PSCSmanatschas
En il dretg penal tutgan smanatschas en la gruppa da «crims e delicts cunter la libertad» e betg – sco blers pudessan pensar – en quella dals «acts chastiabels cunter corp e vita». En il rom dal dretg penal sa tracti d'ina smanatscha, sch'ina expressiun u in'acziun ha chaschunà tema ed anguscha tar l'adressata u l'adressat. I na dependa betg, sch'i vegn smanatschà cun violenza, cun la mort u cun ina novitad snuaivla per la persuna pertutgada. L'idea davos la chastiabladad è che la libertad d'agir da la persuna pertutgada vegn restrenschida cun la smanatscha.
Dasper il fatg ch'ina smanatscha sco tala è gia chastiabla sa tschenta tar smanatschas adina era la dumonda, sche questas acziuns smanatschadas vegnan er exequidas. Per la prevenziun munta quai ch'ins na duess betg mo reagir a moda preventiva encunter las smanatschas, mabain che era la valitaziun da las smanatschas tutga tar la lavur preventiva.
Dapli dal tema "Smanatschas"
Prevenziun svizra da la criminalitad (PSC))
Violenza a chasa
Il dachasa, l'atgna chasa: en sasez il lieu nua ch'ins duess sa sentir segir cun sia famiglia e ses pli chars. Ma deplorablamain na chattain nus là betg adina la segirezza: Sche conflicts predomineschan e vegnan reglads cun violenza tranter las atgnas quatter paraids e tranter persunas che stattan datiers ina a l'autra, discurran ins da «violenza a chasa». En quest mument n'è la soluziun da conflicts betg pli chaussa privata. Surtut betg, sche uffants èn pertutgads.
Dapli dal tema "Violenza a chasa"
Prevenziun svizra da la criminalitad (PSC)
Violenza en la vegliadetgna
Mintg'onn èn dapli che 300'000 senioras e seniors pertutgads da violenza. Mo darar van els per agid. Memia grond è il turpetg e memia gronda la tema da las consequenzas.
Differentas furmas da violenza:
Violenza po vegnir exequida a moda conscienta u nunconscienta e cumpiglia differents aspects:
- violenza fisica (battidas, rentar, arsentadas, etc.)
- violenza psichica (umiliaziun, smanatscha, isolaziun, etc.)
- violenza finanziala (privaziun da daners, sforz finanzial, profit, etc.)
- violenza sexuala (violaziun, abus sexual, etc.)
La Prevenziun svizra da la criminalitad, il Center da cumpetenza vegliadetgna senza violenza e l'Agid a victimas svizzer han lantschà la fin da mars 2023 la campagna da sensibilisaziun «violenza en la vegliadetgna» per encuraschar persunas pertutgadas da discurrer davart il tema e dad ir per agid.
Dapli dal tema "Violenza en la vegliadetgna"
Prevenziun svizra da la criminalitad (PSC)
Nationales Kompetenzzentrum «Alter ohne Gewalt»
Violenza da giuvenils
En l'adolescenza fan intgins giuvenils experientschas cun eveniments violents, saja quai mo sco perditgas, sco victimas u sco delinquentas u delinquents. Sche giuvenils vegnan violents, è quai savens in segn ch'els vulan chattar lur cunfins e ch'els tschertgan lur plaz en la societad. En ils pli paucs cas èn tals surpassaments da cunfins in segn per ina carriera criminala. Tuttina èsi impurtant d'identifitgar gia baud indizis d'in cumportament asocial che pudess sa cronifitgar e da prender mesiras adequatas per impedir quai.
Dapli dal tema "Violenza da giuvenils"
Prevenziun svizra da la criminalitad (PSC)
Stalking
Stalking po restrenscher fermamain las persunas pertutgadas en lur moda da viver. Ellas pateschan savens d'in vair psicoterror fin ad abus corporal. Stalking po chaschunar grevas malsognas psichicas ed isolaziun sociala. Stalking è in fenomen cumplex cun expressiuns e fassettas fitg differentas. Las acziuns nundumbraivlas da la delinquenta/dal delinquent sco acziuns singulas na cuntanschan savens betg il nivel da l'illegalitad. Quai declera per part ch'il fenomen vegn savens percepì pir tard da las persunas pertutgadas, ma era da la persecuziun penala. Ord vista preventiva èsi dentant impurtant d'identifitgar gia baud il stalking e da prender mesiras.
Dapli dal tema "Stalking"
Prevenziun svizra da la criminalitad (PSC)
Armas
«Betg las armas mazzan ils umans, mabain ils umans mazzan ils umans». Davos questa parola stat l'idea ch'igl è l'agressiun umana che po donnegiar autras persunas e betg l'arma per se. Natiralmain na schluppetta in'arma betg enturn simplamain uschia. Tuttina èsi ord vista criminologica memia simpel da mo inculpar ils motivs umans senza contemplar pli da radent las armas. Da sa dustar cun mauns e pes u d'attatgar insatgi cun pugns e chalzeradas dovra dapli abilitad e veglia che da mo smatgar il tgiet dad in'arma! Questa circumstanza resguarda era la legislaziun cun restrenscher la cumpra dad armas e cun regular lur diever.
Dapli dal tema "Armas"
Prevenziun svizra da la criminalitad (PSC)
Post spezialisà per armas da la Polizia chantunala GR
Commerzi cun umans
Il commerzi cun l'uman sco rauba sa transfurmescha gia dapi in pulit temp. La mobilitad simplifitgada e las raits globalas cun agid da meds da communicaziun novs influenzeschan a moda considerabla la dimensiun ed il proceder en il commerzi cun umans. Perquai n'è il commerzi cun umans darar in problem che po vegnir examinà mo sin plaun local e schlià cun intginas mesiras nunprecisas. Il commerzi cun umans è ina furma criminala internaziunala che sto vegnir cumbattida sin nivel internaziunal, naziunal e chantunal.
Dapli dal tema "Commerzi cun umans"
Prevenziun svizra da la criminalitad (PSC)
Temas da segirezza generals
Nagina schanza per laders da velos!
Co Vus vegnis da segirar a moda optimala Voss velo – Adina dapli persunas dovran velos ed e-bikes sco alternativa a l'auto, al bus ed al tren. Ma attenziun: meglier, pli luxurius e pli char che Voss velo è e pli grond ch'è l'interess dals laders. Ina protecziun d'enguladitschs da 100% na datti natiralmain betg. Ma dapli e meglras mesiras da segirezza che Vus prendais e pli nunattractiv che Voss velo vegn per laders. Qua vala: «Dapli è dapli.»
Dapli dal tema "Laders da velos"
Prevenziun svizra da la criminalitad (PSC)
Drogas – na grazia!
Infurmaziuns da la polizia per geniturs e persunas cun represchentanza legala davart ils ristgs e la basa legala en connex cun alcohol ed autras drogas.
En la broschura da la PSC chattan ins tut las infurmaziuns impurtantas davart las modas d'effect ed ils privels da las differentas drogas actualas. Ils fatgs giuridics, las consequenzas pussaivlas en connex cun delicts cun drogas sco era avis per la prevenziun, l'identificaziun tempriva, la terapia e la minimaziun dals donns èn descrits en detagl. Cumplettadas vegnan las infurmaziuns cun exempels da cas ed ulteriurs links ed adressas.
Dapli dal tema "Drogas – na grazia!"
Prevenziun svizra da la criminalitad (PSC)
Voss uffant sulet per via – uschia protegis Vus tuttina el!
Infurmaziuns e tips per geniturs e persunas cun represchentanza legala – delicts cun uffants, commess da creschids esters, èn fitg rars. Quest prospect mussa a geniturs tge ch'els pon tuttina far per minimar il ristg d'abus sexual e da violenza entras esters. El dat recumandaziuns d'agir concretas sco era tips d'educaziun, p.ex. en connex cun temas e secrets. En il prospect è plinavant era descrit co geniturs pon reagir il meglier, sch'i capita tuttina insatge u sch'i pudess esser capità insatge.
Dapli dal tema "Uffant sulet per via!"
Prevenziun svizra da la criminalitad (PSC)
Prevenziun svizra da la criminalitad (PSC)
La PSC
La Prevenziun svizra da la criminalitad (PSC) è in post spezialisà interchantunal per la prevenziun da la criminalitad e la tema da la criminalitad. Ella vegn purtada da la Conferenza da las directuras e dals directurs chantunals da giustia e polizia (CDCGP) e vegn gestiunada da la cumissiun permanenta da la CDCGP, l'uschenumnada cumissiun directiva da la Prevenziun svizra da la criminalitad. La Prevenziun svizra da la criminalitad è domiciliada en la Chasa dals chantuns a Berna.
Colliaziun e barat cun partenaris da cooperaziun
Ina da las pli impurtantas incumbensas da la Prevenziun svizra da la criminalitad è da rinforzar la collavuraziun interchantunala da la polizia en connex cun la prevenziun criminala. Ella collavura en furma da differents projects, temas e campagnas stretgamain cun ils responsabels da la prevenziun dals corps da polizia chantunals e da las citads ed organisescha ina giada ad onn in barat da dus dis. La Prevenziun svizra da la criminalitad tgira ultra da quai contacts stretgs cun l'Uffizi federal da polizia fedpol. Dasper divers acturs statals e chantunals da tut las regiuns svizras tutgan era diversas organisaziuns nunguvernamentalas tar sia rait.
Intermediaziun da messadis da prevenziun a la populaziun
In'ulteriura incumbensa impurtanta da la Prevenziun svizra da la criminalitad è d'infurmar la populaziun davart fenomens criminals, pussaivladads da prevenziun e purschidas d'agid. Quai cumpiglia era l'elavuraziun da broschuras, prospects ed auter davart tscherts temas da la prevenziun criminala (p.ex. infracziuns, stalking, curaschi civil) e per gruppas en mira specificas sco p.ex. giuvenils u senioras e seniors. En lur blog scrivan las collavuraturas ed ils collavuraturs da la Prevenziun svizra da la criminalitad contribuziuns davart differents aspects da la prevenziun criminala e tematiseschan fenomens novs. Da quai fan era part avertiments actuals d'attatgas da phishing ed autras cugliunarias. La Prevenziun svizra da la criminalitad è er activa sin Facebook, Linkedin, Instagram e Twitter.
Cussegliaziun
La Prevenziun svizra da la criminalitad stat a disposiziun a la populaziun en tut ils reguards da la prevenziun criminala.
Per material d'infurmaziun gratuit visitai la pagina-web da la Prevenziun svizra da la criminalitad (PSC)