Dapi l'onn 1975 realisescha la Polizia da traffic regularmain curs spezials sut la direcziun da la Polizia chantunala dal Grischun en il chantun. Ils curs stattan sut il patrunadi da la Conferenza da las cumandantas e dals cumandants da polizia da la Svizra Orientala. Sco cumandant da curs è engaschà chapitani Roger Padrun, schef dals centers da controlla per il traffic pesant e viceschef dal sectur spezialisà Traffic. Sut sia direcziun vegnan scolads ultra da policistas e policists dal Grischun, commembras e commembers da las polizias chantunalas da Son Gagl, Glaruna, Appenzell Dadens ed Appenzell Dadora, Turgovia, Schaffusa e Turitg, persunas che appartegnan al corps da la Polizia da la citad da Cuira, da Winterthur, da Son Gagl e da Turitg, sco er persunas che appartegnan a la Polizia naziunala dal Principadi da Liechtenstein.
Ina truppa maschadada
Per ch'ina scolaziun unitara da la Polizia da traffic possia avair lieu en l'entira Svizra, ha la Conferenza da las cumandantas e dals cumandants da polizia decidì l'onn 2020 ch'ils moduls da scolaziun èn d'adattar als curs da la Polizia da traffic da l'Institut svizzer da polizia. En media vegnan sessanta participantas e participants dals differents corps da polizia scolads e perfecziunads en dus moduls.
Ultra da la scolaziun professiunala stat natiralmain er l'uschenumnà networking en il center
La finamira dal curs è d'approfundar las enconuschientschas, las abilitads ed ils cumportaments da la Polizia da traffic tras instrucziun frontala, discussiuns, barat d'experientschas ed exercizis pratics. Suenter il curs duessan las policistas giuvnas ed ils policists giuvens esser abels da prender las emprimas mesiras en connex cun tut ils eveniments da la Polizia da traffic e savair, cura che spezialistas e spezialists ston vegnir consultads. Sco basa per survegnir in diplom da l'Institut svizzer da polizia ston ins frequentar omadus moduls da curs e passar in examen final en scrit.
Demonstraziun per chapir l'uschenumnà angul mort
En l'emprim modul vegnan intermediads tut en tut 13 temas da scolaziun. Quels cumpiglian la collavuraziun da la procura publica cun la polizia, il dretg davart il traffic sin via sco tal, il traffic agricul sin via, la segirada d'indizis, il vesair da la Polizia da traffic, la tecnica da vehichels, ils documents d'identitad, l'abilitad da manischar, mesiras e pais, l'organisaziun dal lieu da donn, viadis da servetsch urgents, vias d'auta prestaziun fin a la rauba privlusa.
Controlla tecnica dad autos da persunas tar la serenera a Seewis Pardisla
En il segund modul vegnan tractads temas sco vehichels da trend, fotografia d'accident, tuning dad autos da persunas e motos, traffic pesant cun arretaziun da la chargia sco er prescripziuns da lavur, da manischar e dal temp da paus. La teoria vegn cumplettada en omadus moduls cun controllas praticas. Bun quaranta instructurs da tut ils corps da polizia participads garanteschan ina scolaziun fundada.
L'instrucziun ils onns 70