Cun ina roadshow davart la Strategia HRM 2023–2033 e davart il svilup dal persunal èn tut las collavuraturas ed ils collavuraturs da la Polizia chantunala dal Grischun vegnids infurmads davart tschintg champs d'acziun centrals sco er davart il nov Concept per il svilup dal persunal. En il focus èn stadas las duas iniziativas strategicas: «Patruna attractiva» sco er «Direcziun e cultura d'interpresa» da la Strategia Kapo GR 2025+.

La roadshow ha dà invistas cumplessivas dals secturs recrutaziun da persunal/marketing, scolaziun da basa dal persunal, planisaziun e tgira dal persunal, svilup dal persunal/svilup directiv sco er extradas da persunal.

Ina direcziun da persunal adequata ed ina cultura d'interpresa adequata èn decisivas per il success dal svilup dal persunal. Las collavuraturas ed ils collavuraturs profiteschan da la furmaziun supplementara professiunala, dal svilup da la persunalitad e da perspectivas cleras per lur futur professiunal. Quai augmenta la motivaziun, promova l'agen svilup professiunal e segirescha las persunas da cader futuras. Discurs da feedback regulars e la nova scolaziun da manar persunal rinforzan supplementarmain il process da reflexiun ed accumpognan las collavuraturas ed ils collavuraturs sin lur via da svilup individuala.