Incumbensas da la procura per giuvenils
La procura per giuvenils è ina partiziun da la procura publica. Ella è cumpetenta per las inquisiziuns e per la realisaziun da proceduras penalas che pertutgan giuvenils da 10 fin 18 onns.
Il dretg penal per giuvenils vul promover las cumpetenzas dals giuvenils, uschia ch'els pon surpigliar sezs responsabladad e daventar autonoms ed independents. Qua tras duai vegnir impedì in nov cumportament chastiabel.
Decisivas per l'applicaziun dal dretg penal per giuvenils èn la protecziun e l'educaziun dals giuvenils. En il rom d'ina procedura penala per giuvenils na vegnan pervia da quai betg mo eruids il malfatg e la culpa da la delinquenta giuvenila u dal delinquent giuvenil. En collavuraziun cun lavureras socialas e lavurers socials sco er cun pedagogas socialas e pedagogs socials duain er vegnir scleridas sias relaziuns persunalas (famiglia, scola, professiun) per la finala pudair ordinar quellas mesiras educativas u terapeuticas u quels chastis che garanteschan il meglier che la persuna giuvenila na daventa betg pli chastiabla.
Tras in mandat penal giuditgescha la procuratura u il procuratur per giuvenils ils malfatgs ch'ils giuvenils han commess, sch'in dals chastis u ina da las mesiras da protecziun qua sutvart (u ina cumbinaziun da tals e da talas) para dad esser adequata:
Chastis:
- reprimanda
- prestaziun persunala (engaschament da lavur fin ad ina durada da 3 mais)
- multa
- privaziun da la libertad (fin a 3 mais)
Mesiras:
- surveglianza
- assistenza persunala
- tractament ambulant
Plinavant è la procura per giuvenils er cumpetenta per ordinar l'arrest d'inquisiziun e mesiras da protecziun preventivas, per ordinar trenaments cunter l'agressiun e cussegliaziuns en cas da dependenza, per realisar la procedura da mediaziun extragiudiziala, per metter ad acta la procedura sco er per far l'accusaziun e per represchentar quella davant dretgira (en cas che tutgan a la cumpetenza da las dretgiras per giuvenils, sco la collocaziun ordaifer la famiglia, la privaziun da la libertad da passa 3 mais u multas da passa 1000 francs). Dapi il 1. da schaner 2011 è la procura per giuvenils er cumpetenta per l'execuziun dals chastis e da las mesiras.