Plantas problematicas èn plantas che n'èn betg giavischadas tut tenor lieu e caracteristica u frequenza sin surfatschas utilisadas da l'agricultura per motivs ecologics, da la sanadad u economics. Latiers tutgan tant spezias indigenas (plantas problematicas da l'agricultura) sco er exoticas (neofitas invasivas).
Tenor l'art. 16 al. 1 lit. b da l'Ordinaziun davart la terminologia agricula e la renconuschientscha da furmas da manaschi (LBV; SR 910.91) po ina populaziun excessiva da plantas problematicas chaschunar l'exclusiun da la surfatscha utilisada da l'agricultura ed uschia er l'exclusiun dals pajaments directs. Plantas problematicas incl. neofitas invasivas ston vegnir cumbattidas, particularmain ston ins impedir lur ulteriura derasaziun (art. 58 al. 3 da l'Ordinaziun davart ils pajaments directs a l'agricultura, DZV; SR 910.13).
Poss jau segar a temp, sche jau hai claffas (stgarsellas) sin mes prà?
Sch'ils prads vegnan segads a temp al cumenzament da la fluriziun, po la claffa vegnir chatschada enavos efficaziamain. Cun annunziar che Vus vulais segar anticipadamain, survegnis Vus la pussaivladad da regular la claffa er sin surfatschas da promoziun da la biodiversitad (prads pauc intensivs ed extensivs). Premess vegni che la cultivatura u il cultivatur annunzia la surfatscha pertutgada a temp, q.v.d. il pli tard trais emnas avant il termin da segar e cun il Meldeformular. In'unitad da cultivaziun dastga vegnir annunziada maximalmain duas giadas entaifer 8 onns. L'unitad da cultivaziun na dastga betg vegnir dividida en surfatschas parzialas che duain vegnir segadas anticipadamain durant differents onns. Il formular d'annunzia chattais Vus qua.
Tge fatsch jau, sche jau constatesch neofitas invasivas?
In cumbat reussescha mo, sche tuttas e tuts sa participeschan. Nus As supplitgain perquai d'annunziar al UAG cun il formular d'annunzia, sche Vus constatais neofitas invasivas entaifer la surfatscha utilisada da l'agricultura. Qua tras survegnis Vus in termin per cumbatter la planta e sche necessari ina permissiun per segar a temp las surfatschas da promoziun da la biodiversitad. L'Uffizi per la natira e l'ambient (UNA) As porscha sin giavisch in accumpagnament professiunal.
Co tract jau la rigera alva?
Valair vala il princip, ch'ins sto strair ora gia singulas plantas che creschan. Ina giada che la rigera alva è sa derasada, chaschuna sia extirpaziun dapli lavur. Mesiras pussaivlas per cumbatter questa planta sco er in maletg da tala chattais Vus en ils links.