En il chantun Grischun è l'Inspecturat dal register funsil e register da commerzi (IRFRC) l'autoritad da permissiun tenor la Lescha federala davart il dretg funsil puril (BGBB; SR 211.412.11). El dat permissiuns per la cumpra da manaschis e da parcellas agriculas, per excepziuns dal scumond da partiziun reala da manaschis e dal scumond da fragmentar parcellas sco er per il surpassament da la limita d'impegnaziun. Plinavant constatescha el, sch'ina parcella u ina part d'ina parcella tutga en il champ d'applicaziun dal dretg funsil puril
En il decurs da la procedura da consultaziun po il IRFRC dumandar il cunrapport specific dal UAG.
Il UAG è cumpetent per las permissiuns tenor la Lescha federala davart la fittanza agricula (LPG; SR 221.213.2). Quellas èn necessarias per sa cunvegnir ad ina durada da fittanza reducida u ad ina cuntinuaziun da fittanza reducida, per affittar singulas parcellas d'in manaschi agricul e per fixar il tschains da fittanza per in manaschi.
Tgeninas parcellas èn suttamessas a la lescha federala davart il dretg funsil puril (BGBB; SR 211.412.11)?
Il champ d'applicaziun per las parcellas ch'èn suttamessas al dretg funsil puril, vegn descrit en l'art. 2 da la Lescha federala davart il dretg funsil puril (BGBB; SR 211.412.11).
Tgi infurmescha davart il pretsch da cumpra?
L'Inspecturat dal register funsil e register da commerzi (IRFRC), il UAG ed il Plantahof na dattan naginas infurmaziuns davart il pretsch da cumpra da parcellas agriculas. En cas da basegn èsi pussaivel d'incumbensar l'Uffizi per la valitaziun d'immobiglias cun ina dumonda senza obligaziun da valitaziun ch'ins sto alura pajar.
Cura èsi raschunaivel da concluder in contract da fittanza en scrit?
Quai è adina raschunaivel, perquai ch'ils puncts impurtants èn reglads en il contract. Il potenzial da conflicts vegn uschia reducì massivamain. A disposiziun stattan divers models (guardar qua sutvart).