Plazzas d'emplenir e da nettegiar
Per evitar donns locals tras pesticids durant ch'ils apparats da squittar e da sprinzlar vegnan emplenids e nettegiads, dastgan talas lavurs vegnir fatgas mo pli sin plazzas ch'èn equipadas spezialmain per quest intent. Admess èn stabiliments sin il bain puril u installaziuns mobilas. Tals pon er vegnir utilisads da plirs manaschis. Cun mesiras da promoziun chantunalas sustegna il chantun Grischun la construcziun da novas plazzas per emplenir e nettegiar apparats da squittar e da sprinzlar per projects pli pitschens.
Tge pretensiuns ston ademplir las plazzas per emplenir ils apparats da squittar e da sprinzlar?
- La plazza d'emplenir sto esser ermetica e na dastga avair nagina deflussiun.
- La plazza d'emplenir sto avair in volumen da tschiffada suffizient ed ina protecziun da surscul (ur).
- La plazza d'emplenir sto avair in tetg, plazzas mobilas ston vegnir rumidas suenter mintga utilisaziun.
- Plazzas d'emplenir mobilas ston esser equipadas cun in ur ch'è almain 15 cm aut. Il material sto resister a la malaura ed als radis ultraviolets ed avair ina gronda resistenza cunter influenzas mecanicas
- Pesticids spons e liquids da squittar che culan ord il tanc ston pudair vegnir svidads en il tanc dals liquids da squittar u vegnir dismess correctamain. Per quest intent sto esser avant maun l'infrastructura necessaria (pumpa, tschitschader da bletsch u substanzas liantas e recipients).
Tge pretensiuns ston ademplir las plazzas per nettegiar ils apparats da squittar e da sprinzlar?
- Las plazzas da nettegiar ston esser ermeticas.
- La plazza da nettegiar staziunara consista d'ina platta da betun cun ina pendenza d'almain 2 pertschient ad in tumbin d'entrada. Per l'aua da nettegiar dovri in recipient da rimnada.
- La plazza da nettegiar po avair in tetg. En cas ch'ella n'ha nagin tetg, sto l'aua da precipitaziuns vegnir tschiffada e deviada.
- Plazzas da nettegiar mobilas senza tetg ston vegnir nettegiadas e rumidas suenter mintga utilisaziun.
- I vegn recumandà da duvrar la plazza da nettegiar er sco plazza d'emplenir.
Co sto l'aua da nettegiar vegnir tractada?
- I vegn recumandà da procurar per in tractament spezial da l'aua da nettegiar (svapuraziun ed explotaziun da las restanzas dals meds da squittar tras micro-organissems, filtraziun e. u. v.).
- L'aua da nettegiar po vegnir inducida en ina puschinera activa. Sut cundiziuns po l'aua da nettegiar vegnir sternida sin ils champs, sch'ella è schlunganada cun ladim natiral.
- Sut cundiziuns po l'aua da nettegiar vegnir sternida sin ils champs.
- L'aua da nettegiar po vegnir dismessa sco rument spezial.
Datti in sustegn finanzial per la construcziun da plazzas d'emplenir e da nettegiar?
Cun mesiras da promoziun chantunalas sustegna il chantun Grischun la construcziun da novas plazzas per emplenir e nettegiar apparats da squittar e da sprinzlar per projects pli pitschens (guardar en quest connex plazzas per emplenir e nettegiar squittas da pesticids).