L'incumbensa da la planisaziun dal territori èsi da chattar ils dretgs lieus resp. ils lieus ch'èn adattads il meglier per cuvrir ils basegns da spazi. Quai n'è betg ina incumbensa facila, perquai ch'il terren è limità ed ils basegns da spazi èn multifars. La planisaziun dal territori sto far frunt a questas sfidas e chattar las dretgas soluziuns en il champ da tensiun dals interess che stattan per part en cuntradicziun in cun l'auter. La clav per schliar questa problematica è la consideraziun dals interess. Ella tutga tar il mintgadi da la planisaziun dal territori. Pli conscienziusamain e pli baud ch'ils interess vegnan considerads en il process da planisaziun, e pli grondas èn las schanzas da chattar bunas soluziuns ed uschia er d'evitar dispitas giuridicas che tiran las proceduras da planisaziun savens nunnecessariamain a la lunga.

En collavuraziun cun tschintg chantuns e cun la Conferenza dals planisaders chantunals sco er cun il sustegn professiunal d'EspaceSuisse ha il UST-GR fatg tschintg videos explicativs che decleran en moda simpla ils aspects ils pli impurtants da la consideraziun dals interess.