In'avertura cumpetitiva da las regiuns cun colliaziuns d'internet en il sectur dal bindel ultralad (almain 100 Mbit/s) è ina premissa impurtanta per far avanzar la transfurmaziun digitala en il chantun Grischun. Il basegn da l'economia, dal turissem, da las administraziuns, da las scolas, da las instituziuns da provediment e da las persunas privatas d'ina avertura da qualitad s'augmenta cuntinuadamain pervia da las applicaziuns che dovran bleras datas. In'avertura cun l'internet progressiva ed orientada al basegn è uschia in factur essenzial per il svilup economic da las regiuns sco er per l'attractivitad da l'economia locala dal chantun.
Pervia da quai ha il chantun Grischun incumbensà la Scola auta da tecnica ed economia Cuira da far in'analisa da la situaziun d'avertura actuala sin tut il territori chantunal. La quota da las chasadas en il Grischun cun in access ad ina gronda sveltezza da chargiar giu datas è pli gronda en la cumparegliaziun directa per exempel cun il Tirol dal Sid, il Tirol e Baden-Württemberg. Partind da quai ch'il basegn da las interpresas vegn ad esser en l'avegnir en il sectur dal bindel ultralad ha la Regenza decidì la fin da l'onn 2018 da promover l'extensiun da las infrastructuras a bindel lad per render accessibels objects ch'èn relevants per il svilup economic sco er per l'augment da la cumpetitivitad e da l'attractivitad da l'economia locala.
Ina evaluaziun pli detagliada da la situaziun da concurrenza concernent las purschidras ed ils purschiders d'infrastructuras e da servetschs da telecommunicaziun ha mussà che la finamira d'ina avertura equivalenta areguard la qualitad ed ils custs a las grondas aglomeraziuns svizras po vegnir cuntanschida mo cun stimulaziuns cumpetitivas.
Ensemen cun ina gruppa externa d'expertas e d'experts han il Departament d'economia publica e fatgs socials sco er l'Uffizi per economia e turissem elavurà pervia da quai in concept da promoziun, cun il qual las infrastructuras da rait duain vegnir extendidas ad in'autostrada da datas. Quest concept mussa, co ch'ils concepts regiunals d'avertura pon vegnir redigids per lura cumplettar las infrastructuras, e tge prestaziuns da promoziun ch'il chantun po pajar.
Per quest intent engascha il chantun ina gruppa chantunala da strategia e da coordinaziun che sustegna ed accumpogna professiunalmain las regiuns tar questas lavurs. La gruppa chantunala examinescha las propostas e las analisas da la gruppa regiunala areguard lur plausibilitad tecnica ed economica ed areguard la realisabladad. La gruppa chantunala d'expertas e d'experts coordinescha ultra da quai l'avertura surregiunala, integrond las proprietarias ed ils proprietaris actuals da las infrastructuras, eruescha largias d'avertura surregiunalas e procura per la realisaziun d'eventualas mesiras surregiunalas.
L'extensiun da las infrastructuras ha lieu sur las regiuns. Quellas engaschan gruppas regiunalas da coordinaziun e da realisaziun cun represchentantas e represchentants da las autoritads politicas e dals gestiunaris da las infrastructuras regiunalas sco er cun expertas ed experts cumprovads. Questas gruppas regiunalas determineschan, nua ch'i duai dar in'avertura cun colliaziuns da bindel ultralad, evalueschan la realisaziun tecnica ed architectonica e fan in plan da finanzas.
Basa concepziunala
Directiva