En il Grischun sa scuntran auta tecnologia e qualitad da viver: La regiun da temp liber la pli appreziada da la Svizra n'attira betg mo turistas e turists, mabain er interpresas d'auta tecnologia da tut il mund. En il chantun il pli grond da la Svizra chattan firmas orientadas a l'export bler spazi per sa sviluppar e terren fritgaivel per innovaziuns. Ellas profiteschan en la metropola natirala trilingua en il cor da l'Europa da colliaziuns da traffic d'emprima classa, da spezialists topscolads, d'ina stabilitad politica sco er d'in clima fiscal miaivel.

La Svizra è ina part dal spazi economic europeic cun 520 milliuns persunas. En quest connex sa tracti, en relaziun cun la prestaziun economica, da la zona economica la pli gronda dal mund. 50 pertschient dals exports van en pajais da la UE, il rest en tut il mund. La Svizra dispona – ultra da la convenziun cun la AECL e da la convenziun da commerzi liber cun l'Uniun europeica (UE) – actualmain d'ina rait da 33 convenziuns da commerzi liber cun 43 partenaris. Quai avra l'access direct als martgads globals. In'auta capacitad da cumpra, ina capacitad d'innovaziun, ina cumpetitivitad internaziunala ed ina qualitad da viver unica contribueschan a l'attractivitad da l'economia locala.

Il Grischun sco lieu economic en in'egliada

• Interpresas innovativas ed activas globalmain da branschas cun in aut nivel d'enconuschientscha sco Life Sciences, Medtech, Biosciences, ICT, photonics, sensorica, automaziun, construcziun da maschinas e chemia domiciliadas
  
• Il chantun po promover innovaziun d'interpresas cun meds finanzials
  
• Zonas d'industria fitg bain accessiblas cun terren industrial disponibel da passa 300'000 m²
  
• Situaziun centrala per lung da l'axa nord-sid cun in access direct als spazis metropolitans Turitg/Basilea, Minca/Stuttgart e Milaun/Turin
  
• Chargia fiscala moderada (7,83 %1) - 14,77 % dal gudogn net avant la deducziun da las taglias)
  
• Custs da salari e d'immobiglias fin 25 pertschient pli bass ch'en spazis metropolitans da la Svizra
  
• Ina productivitad da lavur 30 pertschient pli auta ch'en la media da la UE
  
• 1,3 milliuns persunas vivan en ina distanza d'ina ura cun l'auto dal Grischun
  
• Passa 108'000 studentas e students a tredesch universitads, scolas autas universitaras e scolas autas spezialisadas en l'intschess d'ina ura cun l'auto dal Grischun
  
• Instituts da perscrutaziun cun colliaziuns internaziunalas
  
• Regiun da temp liber la pli appreziada da la Svizra cun passa 937 pizs e 615 lais sco er destinaziuns da vacanzas multifaras e 15 plazzas da golf
  
• Chantun cosmopolitic cun trais linguas uffizialas (tudestg, rumantsch e talian) ed englais sco lingua da l'economia. En il Grischun vivan umans da passa 130 naziuns.
  
• Qualitad da viver che po strusch vegnir superada sin l'entir mund

1) tar in levgiament fiscal da 100% sin plaun chantunal