Il Grischun porscha tariffas da taglia attractivas accordadas cun ils basegns da l'economia ed amortisaziuns generusas. Firmas suttamessas ordinariamain a la taglia pajan 14,77 pertschient taglias (en pertschients dal gudogn net avant la deducziun da las taglias) u en cas d'ina liberaziun da taglia sin plaun chantunal mo 7,83 pertschient.
Sin l'emprima egliada po quai esser surprendent, ma guardà precis tutga il Grischun per interpresas tar ils lieus ils pli cumpetitivs dal mund: en relaziun cun il product interiur brut per ura da lavur è la Svizra in dals pajais ils pli productivs. Da la lavur administrativa pitschna, dals custs da salari e d'immobiglias pli bass – cumpareglià cun las regiuns metropolitanas svizras – sco er dal clima politic favuraivel a las interpresas resulta sut il stritg ina relaziun excellenta tranter il pretsch e la prestaziun. Quai conferman interpresas residentas sco TRUMPF, Wittenstein, InfoRLife, Hamilton u la gruppa EMS.

Il Grischun renda er dal puntg da vista fiscal

Sche interpresas sa domicilieschan da nov en il Grischun u èn gia residentas e vulan s'orientar essenzialmain da nov en lur manaschi, po il chantun conceder levgiaments fiscals fin a 100 pertschient durant maximalmain 10 onns. Decisiuns preliminaras fiscalas (rulings) dattan ina segirezza da planisaziun finanziala. Cun ils instruments introducids da nov cun la refurma fiscala da l'onn 2020 pon interpresas innovativas profitar d'ulteriurs avantatgs fiscals. La chascha da patentas cun ina distgargia fin a 90 pertschient e la deducziun supplementara per perscrutaziun e svilup fin a 50 pertschient pon chaschunar ina distgargia maximala da 55 pertschient sin il gudogn suttamess a la taglia, quai che resulta en ina tariffa effectiva da la taglia sin il gudogn dad 11,1 pertschient. La tariffa ordinaria da la taglia sin il chapital per interpresas importa 0,488 pertschient, per interpresas senza activitad commerziala en Svizra 0,01 pertschient. En il rom da la politica regiunala po la Confederaziun conceder ad interpresas industrialas ed ad interpresas da servetsch che stattan datiers da la producziun levgiaments fiscals per projects che vegnan realisads en ina vischnanca dals territoris d'applicaziun definids.

Interpresas en il Grischun profiteschan d'avantatgs fiscals

• Decisiuns preliminaras fiscalas (rulings) davart il gener da la taxaziun
  
• Tariffa da la taglia sin il gudogn da 14,77 pertschient dal gudogn net avant la deducziun da las taglia
  
• Levgiament fiscal sin plaun chantunal fin a 100 pertschient e fin a 10 onns
  
• En cas d'in levgiament fiscal da 100 pertschient resulta ina tariffa da la taglia sin il gudogn da 7,83 pertschient dal gudogn net avant la deducziun da las taglia (per maximalmain 10 onns)
  
• Liberaziun da la taglia sin il gudogn en cas d'in levgiament fiscal en il rom da la politica regiunala da la Confederaziun
  
• Chascha da patentas cun in levgiament fiscal da maximalmain 90 pertschient
  
• Deducziun supplementara per perscrutaziun e svilup da maximalmain 50 pertschient
  
• La distgargia maximala en cas d'in gudogn suttamess a la taglia grazia a la chascha da patentas ed a la deducziun supplementara per perscrutaziun e svilup da maximalmain 55 pertschient chaschuna ina tariffa da la taglia sin il gudogn dad 11,1 pertschient dal gudogn net avant la deducziun da las taglia
  
• La tariffa ordinaria da la taglia sin il chapital importa 0,488 pertschient
  
• Senza activitad commerziala en Svizra importa la tariffa ordinaria da la taglia sin il chapital 0,01 pertschient
  
• Reducziun per l'agen chapital imputabel per patentas, participaziuns ed emprests entaifer il concern
  
• Amortisaziuns immediatas da fin 100 pertschient sin investiziuns l'onn d'acquist u da construcziun sco er l'onn suandant

Persunas natiralas en il Grischun profiteschan d'avantatgs fiscals

• Taxaziun fitg moderada da las entradas e dal chapital
  
• En cas d'ina participaziun minimala da 10 pertschient al chapital d'ina SA, ScRL u associaziun profiteschan persunas natiralas che vivan en il chantun da l'imposiziun parziala da taglia dals retgavs da participaziun.
  
• Liberaziun da la taglia sin l'ierta sin la facultad d'ierta per conjugals e per ils descendents directs
  
• Taxaziun pauschala: persunas estras che vivan en il Grischun e ch'èn obligadas illimitadamain da pajar taglia pon – sut tschertas premissas – pajar lur taglias tenor las expensas.