Dals 25 da november fin ils 10 da december 2024 metta il Grischun danovamain in signal cunter la violenza a chasa. Ils dis d'acziun da quest onn mettan il focus sin il tema «Vias or da la violenza». Il chantun appellescha la populaziun, organisaziuns ed instituziuns da participar e po sustegnair finanzialmain occurrenzas u acziuns.

Co chattan persunas ch'èn pertutgadas da violenza sustegn? Tge purschidas d'agid datti per persunas ch'èn violentas e che vulan chalar cun quai? Tge rolla giogan spezialistas e spezialists, l'ambient social e la societad en sia totalitad per sustegnair las persunas sin lur via en ina vita senza violenza? Ils dis d'acziun porschan ina plattafurma per sensibilisar e per dialogar avertamain.

Vias or da la violenza

En il chantun Grischun datti numerusas purschidas d'agid per persunas pertutgadas. Il tema central «Vias or da la violenza» duai gidar a far pli enconuschentas questas purschidas ed a las duvrar dapli. Savens taschan las persunas pertutgadas per tema u per vargugna. Er tgi che suppona u observa violenza a chasa sa senta savens pers. Ils dis d'acziun servan sco plattafurma per sensibilisar e per dialogar avertamain.

La violenza a chasa ha bleras fassettas e n'enconuscha nagins cunfins, ni en reguard geografic e cultural ni areguard ils conturns socials, las furmas e la dimensiun. Cumpigliadas èn tut las acziuns da violenza corporala, sexuala, psichica u economica che vegnan avant entaifer la famiglia u la chasada ubain tranter conjugalas resp. conjugals u partenarias respectivamain partenaris anteriurs u actuals.

Occurrenza da colliaziun

Mesemna, ils 12 da zercladur 2024 envida il Post da coordinaziun violenza a chasa da las 16.30 fin las 18.00 en la ibW Scola spezialisada superiura da la Svizra Sidorientala ad in'occurrenza da colliaziun. I vegnan salvads referats d'input davart il tema da la violenza a chasa, davart las purschidas d'agid existentas sco er pertutgant la realisaziun dals dis d'acziun. A chaschun dal apero successiv èsi pussaivel da tgirar in barat individual cun spezialistas e spezialists e cun autras organisaturas ed organisaturs. Las persunas e las organisaziuns interessadas èn envidadas cordialmain da s'annunziar per telefon (+41 81 257 26 11) u per e-mail fin venderdi, ils 3 da matg 2024.

Participaziun a dis d'acziun cunter violenza a chasa

Annunzia d'ina occurrenza ubain d'ina acziun

Il chantun po sustegnair finanzialmain occurrenzas ed acziuns concernent il tema da la violenza a chasa en general sco er concernent il tema central «Vias or da la violenza» che han lieu durant ils dis d'acziun en il Grischun.

Dumonda per in sustegn finanzial per organisar e per realisar in'occurrenza u in'acziun

Annunzias e dumondas correspundentas ston vegnir inoltradas fin ils 9 d'avust 2024.

Ulteriuras infurmaziuns

Ulteriuras infurmaziuns pon vegnir consultadas al fegl d'infurmaziun. Per dumondas stat a disposiziun il Post da coordinaziun violenza a chasa.