Sozialamt
Uffizi dal servetsch social
Ufficio del servizio sociale
Post da cussegliaziunKlostergasse 57000 Cuiratel +41 81 257 31 50fax +41 81 257 31 60opferhilfe@soa.gr.ch
Lescha federala davart l'elavuraziun da mesiras repressivas per motivs da provediment e da plazzaments en lieus esters fin l'onn 1981 (AFZFG; SR 211.223.13)
Er en il Grischun èn fin l'onn 1981 umans vegnids plazzads, adoptads sut sforz, internads administrativamain u sterilisads sfurzadamain. Las persunas pertutgadas n'avevan savens nagins meds giuridics u mo pussaivladads insuffizientas per sa dustar.
Oz pon persunas pertutgadas da mesiras repressivas per motivs da provediment en il chantun Grischun sa drizzar a las suandantas instituziuns:
Il Museum retic mussa l'exposiziun speziala «Emblidads da la ventira. Mesiras repressivas per motivs da provediment en il Grischun» en il rom da l'elavuraziun istorica da las mesiras repressivas per motivs da provediment. L'exposiziun metta il focus sin tschintg persunas pertutgadas ch'èn naschidas tranter ils onns 1881 e 1957. Gieus auditivs e documents d'archiv raquintan lur destins.
En il rom da l'elavuraziun istorica da las mesiras repressivas per motivs da provediment cumpara in nov med d'instrucziun en tut las trais linguas chantunalas. Il carnet da leger «Agid u sforz?» ed il material accumpagnant appartegnent duain pussibilitar da tematisar en l'instrucziun en scola quest chapitel difficil da l'istorgia grischuna. Ils documents pon vegnir retratgs tar la Chasa editura per meds d'instrucziun.
En preschientscha d'ina represchentanza da las victimas ha cusseglier guvernativ Jon Domenic Parolini inaugurà e surdà ils 9 da november 2018 a la publicitad il «lieu da commemoraziun per las persunas pertutgadas en il Grischun da mesiras repressivas per motivs da provediment e da plazzaments en in lieu ester». Cun stgaffir in lieu da commemoraziun vul la regenza gidar ch'il passà na crodia betg en emblidanza. Communicaziun a las medias.
A l'occurrenza commemorativa dals 22 da november 2017 sper il Fürstenwald a Cuira sa perstgisa il cusseglier guvernativ Jon Domenic Parolini en il num da la regenza dal chantun Grischun per la gronda dolur che las victimas da las mesiras repressivas per motivs da provediment e dals plazzaments en in lieu ester han stuì subir. Communicaziun a las medias.
Il studi «Fürsorgerische Zwangsmassnahmen – Anstaltsversorgungen, Fremdplatzierungen und Entmündigungen in Graubünden im 19. und 20. Jahrhundert» s'occupa da l'elavuraziun istorica da las mesiras repressivas per motivs da provediment en il Grischun. Il project è vegnì finanzià dal chantun Grischun. Qua chattais Vus il studi.
Il project da perscrutaziun «versorgt» da l'archiv grischun per la cultura da las dunnas è deditgà a las mesiras repressivas per motivs da provediment en il Grischun. Sut www.frauenkulturarchiv.ch chattais Vus ulteriuras infurmaziuns.
Infurmaziuns davart activitads sin plaun federal (p.ex. contribuziun da solidaritad) chattais Vus sut www.fszm.ch.