Violenza a chasa designescha violenza corporala, psichica, sexuala u economica che capita entaifer la famiglia u en ina relaziun da partenadi actuala u schliada. Independentamain dal fatg, sche l'autura u l'autur dal delict ha u aveva il medem domicil sco la victima. Violenza a chasa è chastiabla e vegn persequitada d'uffizi en Svizra dapi l'onn 2004.

Exempels da violenza a chasa èn:

• insultar, tementar, umiliar, smanatschar
• pluntar, dar pajadas, morder, stranglar, bittar suenter chaussas, arder
• scumandar contacts cun la famiglia u cun il mund exteriur
• sfurzar ad acts sexuals
• serrar en a chasa
• persequitar, mulestar, guettar
• prender davent la paja
• sfurzar da maridar

Agid e sustegn

Ulteriuras infurmaziuns chattais Vus sin la pagina d'internet dal Post da coordinaziun violenza a chasa.

Participaziun a dis d'acziun cunter violenza a chasa

Ulteriuras infurmaziuns survegnis Vus qua.

Il Post da coordinaziun cunter violenza a chasa

La Svizra è s'associada a la Convenziun dal cussegl da l'Europa davart la prevenziun ed il cumbat cunter violenza envers dunnas e violenza a chasa (convenziun d'Istanbul, mo per tudestg). La convenziun d'Istanbul è ina convenziun internaziunala cumplessiva per prevegnir e per cumbatter violenza envers dunnas e violenza a chasa. Prevenziun da violenza, protecziun da victimas, persecuziun penala sco er in proceder coordinà furman la basa da la convenziun. La convenziun d'Istanbul è en vigur en Svizra dapi il 1. d'avrigl 2018.

Sa basond sin las pretensiuns da la Convenziun d'Istanbul ha il chantun Grischun elavurà ina strategia chantunala per la prevenziun ed il cumbat da violenza a chasa en il Grischun (mo per tudestg).

Il Post da coordinaziun cunter violenza a chasa coordinescha la realisaziun da la strategia chantunala e procura en il chantun Grischun per ina collavuraziun interdisciplinara e professiunala en il sectur da la violenza a chasa.