Scola media commerziala cun AFQ da commerzianta/commerziant e maturitad professiunala economia e servetschs, tip economia
La scola media commerziala cun maturitad professiunala sa drizza a giuvenils che s'interessan per temas economics centrals.
La scola media commerziala è ina scola pretensiusa a temp cumplain dal stgalim secundar II. Ella vegn terminada cun l'attestat federal da qualificaziun (AFQ), ch'è renconuschì dal secretariat da stadi per furmaziun, retschertga ed innovaziun (SEFRI), e per regla cun la maturitad professiunala (MP) economia e servetschs, tip economia. D'ina vart permetta quai d'entrar directamain en la vita professiunala. Da l'autra vart – cun la maturitad professiunala – èsi pussaivel d'entrar senza examen en ina scola auta spezialisada federala.
Ina scola media commerziala cun il model 3+1 (scolaziun a temp cumplain da 3 onns en scola, cumplettada d'in praticum lung dad 1 onn) vegn purschida en il Grischun da la scola chantunala grischuna, dal center da furmaziun Surselva sco er da la scola media svizra alpina Tavau. A la scola media commerziala da la fundaziun "gimnasi svizzer da sport Tavau" (GSST) vegn applitgà in auter model da scolaziun. Quel terminescha suenter 4 onns cun il AFQ da commerzianta/commerziant senza maturitad professiunala. Il nov model da scolaziun dal GSST na prevesa betg in praticum dad 1 onn en in manaschi.
Qua pon ils partenaris da scolaziun chargiar giu ils documents e las infurmaziuns las pli impurtantas:
Documents tar il praticum lung tenor il model 3+1
Branschas "servetschs ed administraziun" sco er "administraziun publica"
Per il praticum lung sto vegnir duvrà il suandant formular da contract. Il reglament davart il praticum lung è ina part integrala dal contract e sto vegnir agiuntà a tal. Il contract sto vegnir emess en 4 exemplars, vegnir suttascrit dal manaschi sco er da la praticanta u dal praticant e vegnir inoltrà a la scola media commerziala.
Entrada en la banca per absolventas ed absolvents d'ina scola media (EBM)
Per il praticum lung sto vegnir duvrà il suandant formular da contract. Ultra da quai fa il manaschi in contract general cun la scola media commerziala per reglar ils dretgs e las obligaziuns da las parts contractantas. Da duvrar è il model dal contract general qua sutvart (che po vegnir munì cun il chau da brev da la scola respectiva). Co che las notas vegnan annunziadas, sto vegnir reglà da cas a cas en enclegientscha vicendaivla tranter las parts contractantas (en las cifras 2.1.2 e 2.2.2 dal contract general).
Per relaziuns da praticum che bancas concludan cun las praticantas ed ils praticants ordaifer il curs EBM valan las directivas da la branscha "servetschs ed administraziun".
Ulteriurs documents davart la scola media commerziala
Newsletter "Scolas medias commerzialas en il Grischun – infurmaziuns actualas"
Questa newsletter infurmescha periodicamain ils partenaris da scolaziun davart la scola media commerziala. La newsletter po vegnir abunada cun trametter in e-mail a ralf.blumenthal[at]ahb.gr.ch.
Links