Scolaras grischunas e scolars grischuns ston reussir en in examen d'admissiun chantunal per entrar en la 1. u en la 3. classa gimnasiala sco er en la 1. classa da la scola media commerziala (SMC), scola media spezialisada (SMS) u scola media d'informatica (SMI).
Per entrar en la 1. classa dal gimnasi absolvan las candidatas ed ils candidats da la 6. classa da la scola primara ➔l'examen d‘admissiun 1G.
Per entrar en la 3. classa dal gimnasi ed en la 1. classa da la SMC, SMI u SMS absolvan las candidatas ed ils candidats il medem examen (➔examen unifitgà). Il dretg d’entrar en il gimnasi resp. en la SMC, SMI u SMS vegn dà basa dal resultat da l’examen. Igl è pussaivel d'absolver l'examen en la 2.u 3. classa dal stgalim secundar I sco er suenter il temp da scola obligatoric (fin e cun l'onn chalendar che la maiorennitad vegn cuntanschida). L'admissiun suenter la 1. classa dal stgalim secundar I n'è betg pussaivla.
Mument da la midada en la scola media
En cas che l'examen d'admissiun 1G vegn dumagnà en la 6. classa da la scola primara, ha la midada en il gimnasi lieu il cumenzament dal proxim onn da scola.
En cas che l'examen unifitgà vegn dumagnà en la 2. classa dal stgalim secundar I, ha la midada en il gimnasi lieu il cumenzament dal proxim onn da scola, la midada en la SMS / SMC / SMI il cumenzament dal surproxim on da scola (il 9. onn da scola vegn anc absolvì en la scola populara). En cas che l'examen unifitgà vegn dumagnà en la 3. classa dal stgalim secundar I u suenter il temp da scola obligatoric, ha la midada en il gimnasi ed en la SMS / SMC / SMI lieu il cumenzament dal proxim onn da scola.
Datas dals examens 2025
L’annunzia electronica succeda entaifer ina tscherta fanestra da temp. Ils termins d’annunzia per l’annunzia electronica èn liants. Annunzias retardadas na pon betg vegnir resguardadas (ils termins d'annunzia èn termins da scadenza).
|
Examen d'admissiun 1G
|
Examen unifitgà
|
| Termin d'examen |
Mardi, ils 11 da favrer 2025 |
Mardi, ils 11 da mars 2025 |
| Termin d'annunzia |
1 d’october 2024 fin ils 16 da december 2024
|
28 da october 2024 fin ils 13 da schaner 2025
|
L’ultim termin d’annunzia
|
Glindesdi, ils 16 da december 2024
|
Glindesdi, ils 13 da schaner 2025
|
Communicaziun da la decisiun da l’examen
Il resultat vegn communitgà cun posta A.
Il medem di a partir da las 18.00 san ins prender invista online al resultat da l’examen sin www.zap.gr.ch. Per l’invista online vegnan duvradas las datas d’access che vegnan utilisadas per l’annunzia electronica da l’examen (vossa adressa dad e-mail ed il pled-clav).
L‘annunzia als examens
L’annunzia als examens succeda be electronicamain via internet. Suenter che l’annunzia ei terminada survegnis Vus ina confirmaziun electronica via e-mail.
Ils suandants documents ston vegnir inoltrads fin il pli tard 3 favrer 2025 tar l'Uffizi per la furmaziun media-superiura, secretariat d'examens d'admissiun, Grabenstrasse 1, 7001 Cuira, u electronicamain a support@zap.gr.ch:
- copia da l'attesta (copia da l'attestat da l'emprim semester 2024/2025)
- copia da la carta d'identitad ni dal pass
En cas da basegn prestan il secretariat d’examens d’admissiun (081 / 257 61 70, support@zap.gr.ch) ed ils secretariats da las scolas medias support tar l’annunzia electronica.
Davart la glista cun las indicaziuns da contact dals secretariats da las scolas medias grischunas
Ulteriuras infurmaziuns
Dumondas e respostas las pli frequentas
Taxa d'examen
Cun s’annunziar als examens èsi da pajar ina taxa d’examen da 100.- francs. Per pajar la taxa d’examen retschavais Vus per posta la fin da schaner da l'onn d'examen in cedel da pajament. Succeda ina retratga suenter la scadenza dal termin d’annunzia, sto la taxa d’examen da 100.- francs vegnir pajada malgrà la retratga.
Examens supplementars
Ils examens supplementars sa drizzan a quellas candidatas ed a quels candidats che na pon betg far l’examen causa da problems da sanadad imprevis u d’in accident ubain che na pon betg cuntinuar cun l'examen durant la realisaziun da l' examen causa da problems da sanadad imprevis u d’in accident. Resguardond las disposiziuns vertentas decida la gruppa directiva examens d’admissiun davart l’admissiun a l’examen supplementar.
Ils examens supplementars han lieu a la Scola chantunala grischuna a Cuira
- Examen supplementar per l'examen d‘admissiun 1G: Mardi, ils 11 da mars 2025
- Examen supplementar per l'examen unifitgà: Gievgia, il 1. da matg 2025
Cumpensaziun da dischavantatgs
Per dumandar ina cumpensaziun da dischavantatgs per ils examens d'admissiun sto vegnir emplenì tant il formular per dumandar la cumpensaziun da dischavantatgs sco er il formular per declerar la liberaziun da l'obligaziun da discreziun. Ils dus formulars ston vegnir inoltrads avant la scadenza dal termin d'annunzia per l'examen d'admissiun cun agiuntar in'expertisa specifica actuala a l'Uffizi per la furmaziun media-superiura, Grabenstrasse 1, 7001 Cuira, u per e-mail ad info@ahb.gr.ch.
Ils formulars ed ulteriurs detagls davart la cumpensaziun da dischavantatgs chattais Vus sut il suandant Link.
Exempels d'examens
Examen d‘admissiun 1G
Examen unifitgà
Profils e purschidas da las Scolas medias chantunalas
La survista chattais Vus qua.