Il pajament da contribuziuns sa basa sin la lescha federala davart la furmaziun professiunala (LFPr / CS 412.10) e sin la lescha davart la furmaziun professiunala e davart purschidas da furmaziun cuntinuanta (LFurm / DG 430.000) sco er sin las ordinaziuns correspundentas.

La partiziun "finanzas e fatgs da contribuziun" elavura las dumondas da subvenziun e calculescha las contribuziuns da questas instituziuns.

Ultra da l'elavuraziun specifica per il sectur da finanzas da l'uffizi fan part da quest champ d'incumbensas er ils pajaments da subvenziuns, il tractament e l'approvaziun dals preventivs e.u.v. da las scolas autas professiunalas, da las scolas professiunalas superiuras e dals instituts da scolaziun da la sanadad e dals fatgs socials.

La lescha davart la furmaziun professiunala dal chantun Grischun sco er la lescha federala davart la furmaziun professiunala reglan la creaziun e la promoziun d'instituziuns transitoricas per passar da la scola populara a la furmaziun professiunala, plinavant la furmaziun fundamentala professiunala per las professiuns ch'èn suttamessas a la lescha federala sco er la furmaziun supplementara professiunala.

La lescha davart lieus da scolaziun en ils fatgs da la sanadad e socials regla la direcziun dal center chantunal da furmaziun per la sanadad ed ils fatgs socials, la subvenziun da lieus da scolaziun sco er la conclusiun da cunvegnas en quest sectur da scolaziun.
La lescha davart las scolas medias regla ils pajaments da contribuziuns a las scolas medias privatas dal chantun.