In barat linguistic pussibilitescha ad uffants e giuvenils d'avair contact cun auters giuvenils tuttina vegls d'ina differenta regiun linguistica e culturala. Grazia a la furma d'inscunter autentica daventa ina lingua estra il med da communicaziun real.

Quest'occupaziun directa cun ina lingua estra auza la motivaziun per l'emprender linguas e meglierescha las abilitats linguisticas. Barat e mobilitad sustegnan dentant er d'auzar la stima da sasez, d'emprender cuntegns da furmaziun centrals sco cumpetenzas interculturalas e da meglierar l'atgna valur sin il martgà da lavur.

La promoziun dal barat tranter las cuminanzas linguisticas tras il il chantun e las vischnancas è francada en il chantun Grischun en la lescha da linguas. Promovì vegn il barat da scolaras e scolars, da classas da scola e da persunas d'instrucziun. Tras il focus sin il barat a l'intern dal chantun profitescha il chantun Grischun triling plinavant d'ina meglra chapientscha tra nter las cuminanzas linguisticas.