En la Svizra e spezialmain en il Grischun ha la plurilinguitad ina muntada che furma l'identitad e dat ina plivalur culturala. La relaziun cun la plurilinguitad e cun la diversitad culturala sin in pitschen spazi è enritganta e pretensiusa a medem temp, tant per l'acquisizun da las linguas sco er per la convivenza.

En il Grischun datti trais linguas uffizialas, tudestg, rumantsch e talian. Questa trilinguitad marca er la purschida da linguas da la scola populara dal Grischun. Uschia datti scolas da lingua tudestga, rumantscha u taliana.

Las linguas uffizialas e da scola vegnan fixadas da las singulas vischnancas tenor ils principis da la lescha da linguas.

Svilups

• Dapi l'onn da scola 1999/2000 vegn instruì talian resp. rumantsch sco emprima lingua estra en las scolas primaras da lingua tudestga. En las scolas primaras da lingua taliana e rumantscha vegn instruì tudestg sco emprima lingua estra.
• Dapi l'onn da scola 2002/03 vegnan instruids sco roms obligatorics ina lingua chantunala (talian u tudestg) ed englais sin il stgalim secundar I.
• Dapi l'onn da scola 2012/13 vegn instruì englais sco secunda lingua estra a partir da la 5. classa primara.
• Sin il stgalim secundar I existan ultra da quai purschidas spezialas dals roms d'elecziun, numnadamain per las linguas naziunalas (t.a. franzos) che na vegnan betg purschidas sco roms obligatorics.