Survista
In barat linguistic pussibilitescha inscunters da scolaras e scolars u da classas dal stgalim primar e secundar I. Uschia emprendan uffants e giuvenils da las trais differentas regiuns linguisticas grischunas d'enconuscher in l'auter. Projects da barat da classas ston per di cumpigliar almain quatter lecziuns davart l'emprender linguas.
Pussaivladads da barat linguistic
|
Tip (exempel)
|
Descripziun
|
|
Partenadis da scolas e da classas
|
Cumpiglia plirs inscunters per onn da scola. Inscunters curts fin pli lungs, cun cuntravisita.
|
|
Barat da classas
|
Inscunters curts (1 fin 3 dis per classa), cun u senza pernottaziun, cun u senza cuntravisita.
|
|
Barat da mesas classas
|
Las classas participantas vegnan fatgas permez ed ina mesadad visita mintgamai la mesadad restanta da l'autra classa. Ina cuntravisita da las autras duas mesadads da las classas è opziunala.
|
|
Barat da rotaziun
|
Singuls scolars resp. gruppas da scolars visitan in suenter l'auter la classa da partenadi e sa participeschan a l'instrucziun. Il barat po succeder uni- u bilateral. Ina maioritad da las scolaras e dals scolars sto sa participar vid il barat.
|
► Questa glista da furmas da barat linguistic na cumpiglia betg tuttas pussaivladads.
Effect da barat linguistic
- Il barat linguistic pussibilitescha ad uffants e giuvenils d'avair contact cun auters giuvenils tuttina vegls da differentas regiuns linguisticas e culturalas.
- Ina lingua estra daventa il med da communicaziun real. Quai auza la motivaziun e meglierescha las abilitats linguisticas.
- Il barat linguistic sustegna il svilup da la persunalitad, el promova la toleranza, l'autonomia e la flexibilitad.
Regiuns/chantuns per barat linguistic
In barat linguistic ha lieu per regla aifer ils cunfins dal chantun u dal pajais. En cas giustifitgads po el avair lieu en l'exteriur vischinant u en ina scola svizra a l'exteriur en il sectur da cumpetenza dal chantun Grischun (oravant tut a la Scuola Svizzera di Milano, Bergamo, Roma).
| Stgalim primar |
Stgalim secundar I |
| Il focus èn activitads da barat pli curtas aifer il chantun (p.ex. singuls dis, barat digital). |
Il focus èn activitads da barat pli lungas aifer u ordaifer il chantun (p.ex. entiras emnas, inscunters fisics). |
► Sch'i n'è betg pussaivel da chattar ina classa da partenadi en las valladas talianas dal Grischun, lura po in barat linguistic alternativamain er vegnir organisà cun ina classa tessinaisa.
Agid finanzial
La contribuziun chantunala per activitads da barat per scolara e per scolar munta a 90 francs per in di e maximalmain a 450 francs per emna (art. 18 ordinaziun da linguas).
Ultra da quai po vegnir fatga ina dumonda a Movetia per contribuziuns finanzialas per il barat da classas.
► La contribuziun chantunala vegn pajada sulettamain per scolaras e scolars da quella classa che realisescha in program da barat linguistic renconischì en il territori en mira (v.d. in'autra regiun linguistica). La classa da partenadi retschavidra dal territori en mira na survegn naginas contribuziuns chantunalas per il medem barat linguistic.
Inoltrar ina dumonda
Dumondas per in barat linguistic èn d'inoltrar da la persuna d'instrucziun cun il formular correspundent a l'Uffizi per la scola populara ed il sport.
► La dumonda sto vegnir inoltrada a l'inspecturat da scola il pli tard quatter emnas avant il cumenzament dal barat linguistic.