Per reducir blessuras en il sport da scola recumonda il Post da consultaziun svizzer per la prevenziun d'accidents (PPA) d'integrar sistematicamain e sapientivamain la prevenziun d'accidents en las scolas. La plattafurma d'internet dal PPA www.bfu.ch/de/dossiers/sport-in-der-schule porscha sustegn pratic a las scolas. Sin la pagina d'internet stattan a disposiziun infurmaziuns multifaras, glistas da controlla e material d'instrucziun per differentas disciplinas da sport ed activitads da scola.
Instrucziun da nudar
Il Plan d'instrucziun 21 oblighescha las instituziuns responsablas per la scola da porscher, – uschenavant sco pussaivel – in'occasiun per l'instrucziun da nudar e constatescha sco cumpetenza da basa en il 2. ciclus che tut las scolaras ed ils scolars san sa mover en moda segira en l'aua e san nudar (guardar controlla da segirezza en l'aua).
Il Plan d'instrucziun 21 e las explicaziuns tar las tavlas da lecziuns. defineschan il rom dal test da nudar. Cumplementarmain ha la AVS precisà las prescripziuns cun las suandantas directivas.
Directivas per l'instrucziun da nudar
Disposiziun da l'uffizi 150 directivas per l'instrucziun da nudar
Controlla da la segirezza en l'aua
Far ina cupitgarola da l'ur dal bogn en l'aua profunda, sa tegnair al lieu sur l'aua per 1 minuta, nudar 50m ed alura sortir da l'aua – quai è la controlla da la segirezza en l'aua (CSA). Cun la CSA vegni examinà, sch'ina persuna ch'è crudada en l'aua, po sa salvar sezza e cuntanscher sezza l'ur u la riva.
Las scolaras ed ils scolars che han absolvì cun success la CSA, survegnan in attest da la persuna d'instrucziun. Quel conferma che la scolara u il scolar ha reussì la CSA e ch'ella u el è cumpetenta u cumpetent avunda per dastgar ir en l'aua profunda survegliada.
En il chantun Grischun duain tut ils uffants avair l'occasiun d'emprender da nudar. La CSA è cuntegnida en il Plan d'instrucziun 21 en il ciclus 1 resp. en il ciclus 2.
La scola populara ha la finamira che las scolaras ed ils scolars possedian il pli tard a la fin da la 4. classa las cumpetenzas da la CSA.
Las persunas d'instrucziun pon empustar ils attests da CSA per lur scolaras e scolars gratuitamain cun quest formular.
Ulteriurs documents e links