Cuminanza da lavur da las regiuns alpinas (ARGE ALP)
La cuminanza da lavur da las regiuns alpinas (ARGE ALP) è vegnida fundada ils 12 d'october 1972 en il Tirol cun la finamira da schliar sco buns vischins problems communabels. En tut l'Europa è ella stada l'emprima fusiun cumparegliabla d'unitads statalas ed autonomas sin il plaun sut ils stadis naziunals e federals.
Finamiras
Cun ina collavuraziun transcunfinala e cun ina instituziunalisaziun minimala ha l'ARGE ALP la finamira da tractar ils interess communabels da ses commembers, cunzunt sin il champ cultural, social, economic ed ecologic. L'ARGE ALP vul er svegliar la conscienza per la responsabladad communabla per il spazi da viver alpin, promover ils contacts tranter ils umans, rinforzar la posiziun dals stadis, da las regiuns, da las provinzas e dals chantuns e tgirar – ensemen cun autras instituziuns – la collavuraziun en l'Europa.
Stadis commembers
Ils stadis commembers da l'ARGE ALP èn il stadi liber Baviera; ils stadis federativs Tirol, Salzburg e Vorarlberg; las provinzas autonomas Bulsaun-Tirol dal sid e Trento sco er la regiun Lumbardia ed ils chantuns Grischun, Son Gagl e Tessin.
Organisaziun
L'organ suprem è la conferenza da las scheffas e dals schefs da las regenzas, che sa raduna ina giada per onn. Il presidi mida annualmain. Responsabla per preparar la conferenza da las scheffas e dals schefs da las regenzas e per realisar lur conclus è la cumissiun da direcziun che sa raduna trais giadas per onn. Per realisar il program da lavur vegnan nominadas gruppas da project cun spezialistas e spezialists dals singuls pajais commembers. La sedia dal secretariat sa chatta a Puntina.
Projects actuals