Il sistem dad e-voting vegn meglierà e sviluppà vinavant cuntinuadamain. Las controllas independentas per incumbensa da la Chanzlia federala vegnan repetidas regularmain. Il basegn d'agir sco er ils ulteriurs svilups planisads vegnan documentads en in catalog da mesiras.

Catalog da mesiras da la Confederaziun e dals chantuns per meglierar e sviluppar vinavant il e-votin (admin.ch) 

Per las suandantas uschenumnadas «Nunconfurmitads» (excepziuns tenor l'art. 16 al. 2 OVE) ha il chantun Grischun survegnì ina permissiun excepziunala:

• L'urna electronica vegn gia decodada la sonda, malgrà ch'ina decodaziun dastga cumenzar – tenor las prescripziuns dal dretg federal – il pli baud la dumengia da votaziun u d'elecziun. Las basas giuridicas chantunalas pussibiliteschan al chantun Grischun da far la decodaziun la sonda.
• La software VCPS per emetter ils attests da votar n'è betg publitgada. La software è gia vegnida applitgada en la fasa d'emprova anteriura e n'è betg vegnida concepida per la publicaziun. La software è vegnida controllada e certifitgada per incumbensa da la Chanzlia federala. In potenzial da meglierament è vegnì constatà. Fatgs critics n'èn dentant betg vegnids chattads. Il chantun testa la software en moda cumplessiva avant mintga diever. Igl è planisà da publitgar ina nova versiun da la software.

La Posta Svizra publitgescha tut las cumponentas relevantas dal sistem dad e-voting e las lascha testar publicamain (program da bug bounty). Annunzias che gidan a meglierar il sistem, vegnan remuneradas finanzialmain. La Posta Svizra infurmescha la publicitad davart annunzias ch'ella survegn en il rom dal program da bug bounty, sco er davart meglieraments dal sistem realisads u planisads.

Infurmaziuns davart il program dad e-voting community da la Posta Svizra (post.ch)
Plattafurma da publicaziun da la Posta Svizra per il code da funtauna e la documentaziun dal sistem (gitlab.com)