La Regenza ha approvà la revisiun parziala da l'Ordinaziun davart las taxas per l'Uffizi per la furmaziun professiunala. Cussegliaziuns da professiun, da studi e da carriera èn dapi il schaner 2022 gratuitas per tut las Grischunas ed ils Grischuns. Cun il conclus dals 25 da schaner 2022 ha la Regenza approvà quella giada la revisiun parziala da l'Ordinaziun davart las taxas per l'Uffizi per la furmaziun professiunala (communicaziun a las medias dals 27 da schaner 2022). En la pratica èsi ussa sa mussà, che tschertas terminologias n'èn betg pli actualas resp. che tschertas disposiziuns n'èn betg avunda concretas. Uschia na vegniva fin ussa betg numnà il servetsch administrativ da l'Uffizi per la furmaziun professiunala «per far duplicats d'attestats da maturitad professiunala». Tras questa revisiun parziala vegnan las terminologias ch'èn utilisadas en l'ordinaziun perquai adattadas levamain e formuladas pli cleramain – midadas materialas na datti però naginas.

Ultra da quai ha la Regenza approvà la revisiun parziala da l'Ordinaziun davart la furmaziun professiunala e davart purschidas da furmaziun cuntinuanta. Er questa revisiun parziala serva en emprima lingia a serrar mancanzas dal dretg vertent e d'adattar singulas disposiziuns a las cundiziuns d'ozendi. Uschia duai tranter auter vegnir cumplettada la concepziun da la carriera sco part impurtanta da la cussegliaziun da professiun, da studi e da carriera. Fin ussa n'era quella betg menziunada en il text da l'ordinaziun. En il senn da la digitalisaziun che avanza svelt duai il text plinavant er vegnir cumplettà cun la pussaivladad d'inoltrar ils contracts d'emprendissadi e da praticum sin via electronica sur l'applicaziun web «Berufsbildungsportal», quai ultra da l'inoltraziun en furma fisica.

La Regenza ha approvà la revisiun parziala da la planisaziun locala che la vischnanca da Flem aveva concludì ils 3 da mars 2024. La revisiun da la planisaziun locala è la premissa dal dretg d'utilisaziun per construir ils dus novs trajects da mountainbike «Foppatrail» e «Startgelstrail».

La vischnanca da Flem e la Gruppa Arena alva planiseschan differentas purschidas turisticas e da temp liber enturn la nova telecabina FlemXpress. Questas purschidas duain gidar ad orientar la destinaziun pli fitg envers in turissem da l'entir onn, da mantegnair sia cumpetitivitad e d'augmentar la valurisaziun entaifer la regiun. Igl è planisà da construir dus trails da mountainbike per famiglias e per principiantas e principiants da trails. Quests trails vegnan ad avair in access direct al FlemXpress. Il «Foppatrail» cumenza tar la fermada Foppa e finescha tar la staziun da val Flem. Il «Startgelstrail» cumenza tar la fermada Startgels e maina tar l'Uaul Runcs en il «Foppatrail». En il rom da quest project vegn er francà l'intent da construir ina nova plazza da giugar per uffants tar la fermada Foppa.

© swisstopo

La Regenza ha approvà la revisiun totala da la planisaziun locala, che la vischnanca da Fideris aveva concludì ils 16 da mars 2023. Il motiv decisiv per la nova planisaziun è stà particularmain quel da resguardar las prescripziuns dal dretg da planisaziun surordinà. L'emprima etappa da la revisiun dal dretg davart la planisaziun dal territori (LPT1) ha principalmain la finamira da franar l'extensiun da las zonas da construcziun en il terren cultivà e da diriger il svilup dals abitadis vers anen. Tenor il Plan directiv chantunal è Fideris ina vischnanca cun ina zona d'abitar, maschadada e dal center (ZAMC) memia pitschna. Correspundentamain ha la vischnanca examinà ed adattà las zonas da construcziun, e quai areguard la grondezza, la dimensiun e l'utilisaziun. Tut en tut vegn la zona d'abitar, maschadada e dal center engrondida per var 4656 meters quadrat.

© Andrea Badrutt

La Regenza ha approvà la regulaziun transitorica per manar vinavant l'Ovra electrica Pintrun a partir dal 1. da december 2024 fin a l'entrada en vigur da la nova concessiun dal dretg da las auas, il pli tard ils 30 da november 2027. La Regenza na vegn betg ad avair approvà cun vigur legala la nova concessiun dal dretg da las auas fin ils 30 da november 2024, cura che la concessiun existenta scada. Per quest motiv dovri ina regulaziun transitorica.

L'Ovra electrica Pintrun a Trin è vegnida messa en funcziun l'onn 1944 ed utilisescha dapi lura las forzas idraulicas dal Flem per producir energia electrica. Il stabiliment tar il lai da fermada Pintrun (er numnà lai da fermada Isla) ha ina prestaziun installada da var 6,5 megawatts sco er ina producziun d'electricitad annuala dad en media ca. 30 uras gigawatt. En il rom da las tractativas davart il return da l'implant a la concedenta èn la vischnanca da Trin, il chantun Grischun e la gestiunaria actuala, la Axpo Hydro Surselva SA (AHS), sa cunvegnids da manar en l'avegnir l'Ovra electrica Pintrun sco ovra partenaria sin basa d'ina soluziun colleghiala. La basa per questa ovra partenaria è l'Ovra electrica Pintrun SA (PIN) ch'è vegnida fundada l'avust 2024. A partir dal december 2024, suenter la scadenza da la concessiun, duai la PIN manar vinavant l'Ovra electrica Pintrun.

 

© Axpo Hydro Surselva SA