La Regenza ha deliberà la revisiun parziala da l'Ordinaziun davart las taxas per l'Uffizi per la furmaziun professiunala. Cun abolir las taxas per las cussegliaziuns dat ella a tut las persunas che vivan en il Grischun access a la cussegliaziun da professiun, da studi e da carriera independentamain da lur posiziun sociala, da lur vegliadetgna e da lur furmaziun preliminara.

Cun abolir l'obligaziun vertenta da surpigliar ils custs pon tut las persunas che vivan en il Grischun profitar gratuitamain da la purschida da cussegliaziun. Per persunas che vivan ordaifer il chantun, vegn la taxa vertenta en l'autezza da 150 francs per ura da cussegliaziun mantegnida.

Impurtant post da consultaziun en il process da la tscherna da professiun e da studi
La Cussegliaziun da professiun, da studi e da carriera (CPSC) gioga ina rolla impurtanta en il process da la tscherna da professiun e da studi da giuvenils. Ultra da quai cusseglia ella persunas creschidas durant lur entira carriera professiunala davart tut las dumondas da la planisaziun da la carriera individuala, en situaziuns da midadas professiunalas u sin via vers in'emprima scolaziun. Ultra da quai è la CPSC in post da consultaziun per scolas, per manaschis d'emprendissadi e per interpresas. Cun ses servetschs e cun sias purschidas furma ella lioms tranter ils basegns da las persunas individualas, las purschidas dal sistem da furmaziun ed ils basegns da l'economia sco er dal martgà da lavur.

Cun abolir las taxas reagescha la Regenza er sin in studi naziunal dal psicolog da lavur e d'organisaziun prof. dr. Andreas Hirschi, che datescha da l'onn 2018. Tenor quest studi pudess in'obligaziun da surpigliar ils custs per prestaziuns da la Cussegliaziun da professiun, da studi e da carriera chaschunar in sutprovediment sistematic da tschertas gruppas da persunas ch'èn savens gia dischavantagiadas socialmain.

Purschida supplementara «viamia»
Il Cussegl federal ha concludì il matg 2019 ina retscha da mesiras per promover il potenzial da las forzas da lavur svizras. Ina da las mesiras prevesa che las persunas a partir dal 40. onn da vita pon profitar en l'entira Svizra d'ina reponderaziun da la situaziun, d'ina analisa dal potenzial e d'ina cussegliaziun da carriera gratuitas. Perquai ch'il mund da lavur sa transfurma svelt e per mantegnair l'abilitad sin il martgà da lavur fin il pensiunament, sto l'atgna carriera vegnir creada activamain. Las lavurantas ed ils lavurants a partir da 40 onns duain perquai pudair far – en cas da basegn – ina reponderaziun da la situaziun, nua che lur situaziun professiunala e persunala vegn analisada e reflectada resguardond ils basegns dal martgà da lavur che sa midan. Il project «viamia» ha primarmain in caracter preventiv ed è concepì sco mesira per persunas a partir da 40 onns che n'han nagin dretg da survegnir purschidas da scleriment e da cussegliaziun cumparegliablas da las assicuranzas socialas u da l'agid social. Il chantun Grischun sa participescha dapi il cumenzament da l'onn 2022 medemamain a «viamia». Ulteriuras infurmaziuns chattais Vus sut www.viamia.ch.

Infurmaziuns:

cusseglier guvernativ dr. Jon Domenic Parolini, schef dal Departament d'educaziun, cultura e protecziun da l'ambient, tel. +41 81 257 27 01, e‑mail Jondomenic.Parolini@ekud.gr.ch

Responsabladad: Regenza