Allegra a las lecturas ed als lecturs da la newsletter dal Post spezialisà per l'integraziun
Gugent vuless jau ma preschentar a Vus, perquai che jau vegn ad absolver dal favrer fin il fanadur in praticum «La lavur sociala accumpogna giuvenils ch'èn immigrads tard» tar il Post spezialisà per l'integraziun. Jau hai num Meron Tekie e viv a Cuira.
La diversitad sociala e la convivenza en in mund globalisà m'han adina interessà zunt fitg. Perquai sun jau ma decidida per in studi da lavur sociala a la Scola auta spezialisada OST a Son Gagl, che jau vegn a terminar durant la stad da quest onn. En il rom da mes studi hai jau approfundà mia savida davart ina migraziun persistenta e davart in sistem da furmaziun gist, sco er davart blers ulteriurs temas che sa fatschentan da la coesiun en ina societad che sa mida. Mes focus hai jau mess sin ils giuvenils immigrads tard en il sistem da furmaziun. Quest tema m'occupa spezialmain, perquai che jau sun mezza vegnida en Svizra sco giuvenila e sun stada confruntada persunalmain cun las sfidas en quest sectur.
Per mes praticum hai jau chattà cun il Post spezialisà per l'integraziun ina organisaziun, nua che jau dastg applitgar ed extender la savida che jau ma sun acquistada en quest sectur. Jau vegn a collavurar en in project da pilot che accumpogna ils giuvenils immigrads tard durant la fasa da lur passadi en il mund da lavur. Jau ma legrel da pudair integrar ed engrondir mias experientschas en quest project ed jau al vegn er ad accumpagnar scientificamain cun mia lavur da bachelor.
Mintga giuvenil ha in potenzial che tradescha diversitad e ritgezza. Igl è fitg impurtant da sustegnair ils giuvenils e d'integrar lur diversitad en in process d'integraziun persistent. Sco futura lavurera sociala en il project da pilot dal Post spezialisà per l'integraziun vuless jau gidar ils giuvenils sin lur via davent da la scola en la vita professiunala ed als dar sustegn per chattar lur via en in futur independent e satisfaschant. Gugent vuless jau cooperar ed als intermediar instruments ed abilitads per ch'els possian sa participar activamain a la vita sociala, sviluppar lur potenzials e prender decisiuns en atgna responsabladad.
Cordials salids
Meron Tekie