En noss temp daventi pli e pli difficil da chattar giuvens talents motivads per professiuns manualas. L'exempel da Jacob «Köbi» Frey, in maister tschentapalantschieus da Cuira, mussa co ch'il Post spezialisà per l'integraziun dal Grischun unescha cun success interpresas e persunas spezialisadas immigradas.

Jacob Frey, che ha fundà sia interpresa avant 20 onns, è stà ditg a la tschertga da novs emprendists. Ils ultims onns senza resonanza. «Jau hai gia scolà set fin otg emprendists, ma ils ultims 4 onns n'hai jau survegnì naginas dumondas per plazzas d'emprendissadi», rapporta Frey. La professiun da tschentapalantschieus pretenda in engaschament corporal, ma ella porscha er bleras pussaivladads creativas e manualas.

Ina casualitad cun grond effect
D'ina enconuschenta che dat curs da tudestg, ha Frey intervegnì dad Artem Karpanov, in giuven Ucranais cun ina passiun manuala. Els dus èn s'inscuntrads e svelt èsi stà cler: Quai va bain! Dal matg fin l'october ha l'um da 37 onns absolvì in praticum en il manaschi. «Artem è propi stà in da sis en il lotto. Gia a partir da l'emprim di funcziunava tut perfetgamain, tant en la professiun sco er sin il nivel uman», sa legra Frey.
Grazia a la cussegliaziun dal jobcoach Marcus Kindle dal Post spezialisà per l'integraziun dal Grischun ha pudì vegnir chattada ina soluziun da lunga durada. A partir da l'avust 2025 vegn Artem Karpanov a cumenzar l'emprendissadi uffizial da 3 onns sco tschentapalantschieus. «La collavuraziun cun il post spezialisà è stada senza incaps. En spezial il jobcoach Marcus Kindle ans ha adina cusseglià ed er gidà en tut las fatschentas birocraticas», uschia Frey.

Novas vias per interpresas e per emprendistas ed emprendists
Artem sez sa legra fitg da la schanza. En l'Ucraina aveva el bain absolvì in emprendissadi sco inschigner per energia termica, n'ha dentant mai lavurà en quella professiun. Percunter è el stà activ sco fotograf. «Jau hai però gia adina siemià da lavurar cun ils mauns e da crear cun lain. Ussa poss jau realisar quest siemi en Svizra.»

Cun quest exempel mussa il Post spezialisà per l'integraziun dal Grischun, quant simpel ch'i po esser per manaschis d'integrar persunas spezialisadas talentadas e motivadas da l'exteriur. «Bleras interpresas na san gnanc, ch'igl è pussaivel da laschar far fugitivas e fugitivs in emprendissadi», declera Frey. «Jau poss mo recumandar quai a mintgin: Dai ina schanza a questas persunas. Quai sa paja per tuttas duas varts.»
Grazia al sustegn dal Post spezialisà per l'integraziun èsi stà pussaivel da dumagnar tut ils obstachels birocratics, ed Artem Karpanov ha ussa la pussaivladad d'absolver ina scolaziun svizra renconuschida. «Da quai sun jau fitg superbi», di el. «Quai ma dat bleras pussaivladads per l'avegnir.»

 Post spezialisà per l'integraziun dal Grischun: Ina punt tranter interpresas e persunas spezialisadas
Quest exempel mussa en moda impressiunanta, co che l'integraziun po funcziunar en la pratica. Il Post spezialisà per l'integraziun dal Grischun sustegna tant interpresas sco er fugitivas e fugitivs. El fa quai cun porscher cussegliaziun, cun intermediar contacts e cun gidar a liquidar las formalitads necessarias.

Las interpresas che han er interess d'integrar ina persuna spezialisada motivada, pon sa drizzar directamain al post spezialisà. Las experientschas positivas da Jacob Frey e dad Artem mussan: L'integraziun en il mastergn n'è betg mo pussaivla – ella porta er avantatgs multifars per tut las parts participadas.