Cun la publicaziun «Integraziun en il focus 2024» che cumpara ina giada l'onn dain nus mintgamai la primavaira in'invista en las incumbensas ed ils projects che occupan nus en il rom dal program chantunal d'integraziun. Mintga ediziun focussescha sin l'accent da l'onn actual dal Post spezialisà per l'integraziun. L'onn 2024 èn quai l'integraziun sociala.

Editorial Mona Faragallah, interpreta interculturala

Preziada lectura, prezià lectur

Jau sun sco mia mamma. Fitg sociala cun ina tenuta da basa positiva. Lamentar na tutga betg tar mes esser. Per fortuna, quai ha levgià mia partenza en Svizra. Jau sun coptic-ortodoxa e sun vegnida avant 8 onns cun mes um da quella giada da l'Egipta en il Grischun. Sco cristiana n'hai jau là betg pli survegnì lavur ed er mes um sirian era sin ina glista naira per motivs politics. Sin mia sora han ins perfin bittà crappa... Nus avain laschà enavos tut.

Il cumenzament en Svizra è stà difficil. Mes bachelors egipzians sco schurnalista e sco spezialista d'hotel eran qua senza valur. Er la lingua hai jau ditg stuì emprender sin agens custs. Mia emprima lavur hai jau finalmain survegnì sco forza / persuna da nettegiament, jau hai schubergià en tualettas ils vomits da turists. Pli tard sun jau reussida d'absolver la scolaziun da recepziunista. Jau cussegl a tuttas ed a tuts da tegnair la dira e da s'adattar tant sco pussaivel a las cundiziuns da viver da qua. Jau hai adina vesì quai sco schanza per mes svilup persunal. Forsa er per motivs d'autoprotecziun. Mo sco umans n'essan nus gea mai simplamain a fin. Che jau ma movia vinavant, per quai procura tranter auter mes partenari Adrian, mez da Tusaun, mez da la Grezia...

Cun mia natira allegra èsi per fortuna stà simpel per mai da chattar contacts socials. Per auters è quai pli grev. Perquai che jau lavur plinavant anc sco interpreta ed intermediatura interculturala, aveva ed hai jau bler contact cun umans. Famiglias curdas, svizras, portugaisas. Per part resultan da quests contacts perfin amicizias. Er mia mamma sa legra cun mai da lontan.

Mona Faragallah
Interpreta interculturala

Editorial Felix Birchler, manader dal Post spezialisà per l'integraziun

Preziada lectura, prezià lectur

Persunas che la natira n'ha betg benedì cun levezza e ch'èn plitost timidas, han magari ina sort pli greva. Mona Faragallah accepta senza lamentar sias difficultads d'emprender la lingua e da far ils emprims pass en il mund da lavur – auters sa laschan franar en talas situaziuns. Forsa anc betg cur ch'i va per gudagnar il paun da mintgadi, dentant il pli tard cur ch'ellas u els tschertgan access a la vita culturala, cun il sport u cun lur vischinanza. Sco societad orientada al consens stoi esser nossa finamira, che tut ils umans possian sa participar a la vita sociala. Quai sto valair er per persunas che n'han betg la fortuna d'avair ina professiun u ina scolaziun ch'als porscha bleras pussaivladads da contact ed er per persunas ch'èn plitost introvertidas.

Savens ans bloccain nus sezzas e sezs la via da promover contacts tranter persunas immigradas ed indigenas. Simpels inscunters interumans fan naufragi pervi da pregiudizis u pervi da la tema da s'avrir vers ina persunalitad estra. Bleras persunas engaschadas en il sectur social, da la furmaziun u da la sanadad lavuran di per di per construir punts sin quest champ. Er noss post spezialisà promova las pussaivladads socialas d'integraziun e d'inscunter. Il pli gugent, sche l'impuls per in project vegn da la populaziun immigrada u da la populaziun indigena sezza. En quest senn: betg lamentar, mabain far – noss sustegn avais Vus.

Felix Birchler
Manader dal Post spezialisà per l'integraziun